Halyqtar men mádenıetterdi baılanystyrǵan jýrnalıst: Rınat Dosymovtyń esimi kitaphana bólimine berildi

Kópshilik bul sheshim qalamy arqyly halyqtar men mádenıetterdi, ıdeıalardy biriktirgen jýrnalıstiń eńbegin baǵalaý, esimin dáripteý ekenin aıtady.

Rınat Dosymov 2025 jyldyń 15 tamyzynda dúnıeden ozǵan edi. Ol ómirden ótken soń bir jylǵa jýyq ýaqyttan keıin, esimi Muhtar Áýezov atyndaǵy Ortalyq qalalyq kitaphananyń polıak bólimine berildi. Іs-sharaǵa qatysýshylar jýrnalıstiń bastamalary túrli jobalar arqyly áli de jalǵasyp jatqanyn birneshe qaıtara aıtty.

Jýrnalıstiń atyn kitaphana bólimine berýge arnalǵan jıynǵa árqıly salada qyzmet etetin ondaǵan adam jınaldy. Onyń áriptesteri, dostary, etnomádenı uıymdar ókilderi, qoǵam qaıratkerleri jáne jýrnalıspen birlesken jobalardy atqarǵan azamattar bir zalda bas qosty. Olardyń biri Rınat Dosymov jaıly estelikterin bólisse, ózgeleri onyń kásibı jáne qoǵamdyq ómirindegi eleýli eńbekteri jóninde sóz qozǵady.

Jıynda alǵashqylardy biri bolyp, Astanadaǵy Polsha elshiliginiń ókilderi sóz aldy.

— Bizdiń memleket qaıratkeri, Senattyń alǵashqy marshaly Andjeı Stelmahovskıı árdaıym shyǵystaǵy polıaktardy qoldaýǵa aıryqsha kóńil bóletin. Biz bul mıssııany búgin de jalǵastyryp kelemiz. Otannan jyraqta polıak mádenıetin saqtaý — zor ári úzdiksiz eńbek. Osyndaı talpynystardyń arqasynda mádenıet jáne dástúr odan ári ómir súredi, — dedi olar.

Sonymen qatar, polıak elshiliginiń ókilderi Rınat Dosymovtyń atalǵan maqsatta jumys istep, aýqymdy jobalardyń bel ortasynda júrgenin atap ótti.

— Úlken dúnıelerdi jasaýǵa ıdeıalar, ynta men eńbek kerek. Rınatta mundaı qasıet bolatyn. Biz ony polıak tilin tez meńgerip, qyzmetine ózin, ómirin tolyq arnaǵan adam retinde eske alamyz, — dedi olar.

Osy baǵyttaǵy estelikti Kazinform agenttiginiń kommertsııalyq qyzmetiniń bas mamany Qalamqas Ábýova jalǵastyrdy.

— Eń bastysy, búgin ol el esinde. Rınattyń esimi osyndaı is-sharalarda aıtylady, al isi áli de jalǵasyp jatyr. Demek, onyń mádenı bastamalar men kitaphana keńistigine qosqan úlesi, shyn máninde, mańyzdy bolǵany, — dedi ol.

Sonymen qatar, Qalamqas Ábýova Rınat Dosymovtyń Kazinform agenttiginde on jyldan astam ýaqyt shyǵarýshy redaktor bolyp istegen qyzmetine toqtaldy.

— Rınat aýysymda bolǵanda, eshqandaı olqylyq ketpeıtinine árdaıym senimdi júretinbiz. Kez-kelgen sheshimdi óz betimen qabyldaı alatyn nemese talqylaýdan keıin eń durys sheshimdi tańdaı biletin. Óte saýatty boldy, tarıhty jaqsy bildi, ár sózge jaýapkershilikpen qarady. Onyń aldynan ótetin ár materıal túrlenip shyǵa keletin. Agenttikte jumys istegen qanshama jyldyń ishinde Rınat qyzmetinde birde-bir ret súringen emes. Ol joǵary deńgeıdegi kásibı maman, eń bastysy óz jumysyn shyn jaqsy kóretin adam boldy, — dedi Qalamqas Ábýova.

Sonymen birge, Rınat Dosymovtyń jýrnalıstik qyzmetinen bólek, qalamgerlik qyry da bar edi. Ártúrli tilderdegi sózderdi qoldanyp, óleńder jazdy. Ásirese, polıak tiline degen yqylasy ózgeshe bolatyn.

«Bala kezinen óner adamy boldy»

Jýrnalıstiń aǵasy Marat Dosymovty da áńgimege tarttyq. Onyń sózinshe, Rınattyń shyǵarmashylyqqa beıimdigi, ónerge mahabbaty kishkentaı kezinen baıqalǵan.

— Ol bala kezinen shyǵarmashylyq adamy boldy. Kóp sýret salatyn, án shyrqaıtyn. Aýyl jurty úshin mádenı is-sharalar uıymdastyratyn. Sol kezdiń ózinde kópshilikti aınalasyna úıirip, qarapaıym ıdeıalardy eleýli oqıǵalarǵa aınaldyra biletin, — deıdi jýrnalıstiń aǵasy.

Onyń sózinshe, Rınat ómir boıy osy qalpynan tanbady.

— Ideıalary sarqylmaı, únemi jańa bastamalardy qolǵa alyp júretin. Óziniń isin ýaıymdap, sońyna deıin jetkizýge tyrysatyn. Ómiriniń sońynda óleńderin polıaksha jaza bastady. Jyrlary onyń jan dúnıesi bolatyn, sol arqyly sóz kıesin sezindi, — dedi Marat Dosymov.

«Ómirin kitap, adamdarǵa jáne ıdeıaǵa arnady»

Kókshetaýdaǵy polıak jastar mádenı ortalyǵynyń burynǵy basshysy Tatıana Bahalovıch te estelikterin bólisti. Ol Rınat Dosymovpen 2005 jyly tanysyp, keıin uzaq jyl boıy shyǵarmashylyq áriptestikte bolǵan.

— Rınatpen 2005 jyly tanysyp, birge jumys isteı bastadyq. Ol bizdiń shyǵarmashylyq bastamalarymyzǵa atsalysatyn. Án aıtýdy jany súıdi. Dýet pen toptar uıymdastyrdy. Ashyq-jarqyn minezimen, sharshamas-talmas qaıratymen tez sińisip, árdaıym jumysqa «qoıyp ketetin», — dedi Tatıana Bahalovıch.

Jýrnalıst Astanaǵa ketkennen keıin de kásibı jáne shyǵarmashylyq baılanys úzilmegen.

— Elordaǵa qonys aýdarsa da, baılanysta bolyp, birlesken jobalardy aqyldasyp, atqardyq. Kóp jyl boıy bir shyǵarmashylyq ortada boldyq, — dedi Tatıana Bahalovıch.

Sonymen qatar, onyń sózinshe, Rınattyń ǵumyrynda kitaptar jáne shyǵarmashylyq orta eleýli oryn alǵan. Jýrnalıst osy qundylyqtarmen ómir súrip, mádenı úderisterden bir kúnge de ajyramaǵan. Saparda ne kezdesýde áldekim kitap syılasa, balasha qýanyp, úıindegi kitaphanasyn baıyta bergen. Onyń izi birneshe mádenı keńistikte qaldy.

— Ol polıak mádenıetine ǵana emes, tatar jáne nemis mádenı ortalaryna da eńbek sińirdi. Ózi «men bárine jetemin» deıtin. Ómir joly, rasynda da, osy sózine laıyq boldy. Meıirimdi ári ashyq-jarqyn adam edi, –dedi Tatıana Bahalovıch.

Sonymen birge, ol kópultty ortada ósip, qalyptasqan Rınattyń barlyq ult ókili men mádenıetti syılaǵanyn atap ótti.

Ólmes eńbek, sónbes esim

Búginde Rınat Dosymovtyń aty berilgen kitaphana bólimi — onyń esimin saqtaıtyn ǵana emes, sondaı-aq, qyzmeti men shyǵarmashylyǵyn odan ári jalǵastyratyn oryn.

Rınat kásibı jýrnalıst, bastaǵan isin sońyna deıin jetkizetin tabandy azamat jáne túrli halyqtardyń mádenıetin baılanystyratyn shyǵarmashylyq ıesi retinde el esinde qaldy.

Іsine jan-tánimen adal berilgen tulǵa ózi dúnıeden ótse de, bastamalary men ıdeıalary ómir súre beretini anyq.

Aıta keteıik, buǵan deıin de Rınat Dosymov týraly jazǵanbyz. Ol túrli basylymdarda jýrnalıst, sholýshy, arnaıy joba jetekshisi, redaktor bolyp jumys istedi. Jýrnalıstıkada shamamen 20 jyl eńbek etti, onyń eleýli bóligi Kazinform agenttiginde ótti. Joǵary kásibıligi, uqyptylyǵy jáne minsiz jaýapkershiligi, qyzmetine degen adaldyǵy úlgi tutarlyq edi.