Halyqpen kezdesý gıbdrıdti formatta ótedi – Erbolat Dosaev
Almaty qalasynyń ákimi Erbolat Dosaev elordadaǵy eseptik kezdesýinde BAQ ókilderine aýqymdy suhbat beretinin aıtty, dep habarlaıdy Kazinform.
Ol sondaı-aq halyqpen kezdesý ótkizý formaty ózgeretinin atap ótti.
«Men halyqpen kezdesýdi toqtatqan emespin, toqsan saıyn kezdesip turýym kerek. Munda jaı ǵana format ózgerdi. Osy jyldyń tórtinshi toqsanynda men aýdandarǵa shyǵa bastadym. Barlyq segiz aýdandy aralap shyqtym. Problemalyq ýchaskelerde boldyq, halyqpen kezdesýler jergilikti jerlerde ótti. Sondyqtan endi gıbrıdti shema bolady. Birinshi toqsanda dástúrli formattaǵy kezdesýler bolady, barlyq turǵyndy shaqyramyn, suraq-jaýap formatynda órbıdi. Keıinirek jergilikti aýdandarǵa shyǵa bastaımyz. Bul shema turǵyndarǵa qajetti sheshimder qabyldaı alatyn kezde yńǵaıly bolady. Jalpy bıyl 8 aýdan boıynsha 32 kezdesý ótkizildi», - dedi E. Dosaev Ortalyq kommýnıkatsııalar qyzmetinde ótken baspasóz brıfınginde.
Sonymen birge Almaty ákimi jýrnalısterge jan-jaqty suhbat berýdi josparlap otyrǵanyn da tilge tıek etti.
«Shynymdy aıtsam, ákim bolyp jumys istegeli rasynda da suhbat bergen joqpyn. Sebebi qazirgi jumysym jáne jýrnalıstermen, halyqpen qarym-qatynas jasaý múmkindigi qala ákimi retinde nazarda bolýyma múmkindik beredi dep sanaımyn. Kelesi jyldyń basynda «Almaty TV» óziniń 25 jyldyǵyn atap ótedi. Men de aldyn-ala qorytyndylar boıynsha emes, naqty kórsetkishter anyqtalǵanda alǵashqy suhbat berýge nıettimin. Ári qaraı kóre jatarmyz. Baspasóz qyzmetinde suhbatqa tilek bildirýshiler tizimi bar. Biz eshkimdi renjitpeı-aq bárimen suhbattasýǵa múmkindik alamyz», - dedi Erbolat Dosaev tilshiler suraǵyna bergen jaýabynda.
