Halyqqa qyzmet kórsetetin avtobýstardyń 25 paıyzy ábden tozǵan

ASTANA. KAZINFORM — Elimizde 10 500 avtobýs halyqqa qyzmet kórsetedi. Onyń 25 paıyzynyń tozyǵy jetken. Bul týraly Kólik mınıstrligi Avtomobıl kóligi jáne kóliktik baqylaý komıteti tóraǵasynyń orynbasary Selim Qýanyshuly aıtty. 

— Qazirgi kúni elimizde 10 500 avtobýs halyqqa qyzmet kórsetedi. 2024 jyldyń qorytyndysy boıynsha onyń tozyǵy jetkeni — 25 paıyz. Osydan 4 jyl buryn bul kórsetkishi 45 paıyz bolǵan. Jyldan jylǵa jańartý júrgizilip jatyr. Úkimetten jergilikti atqarýshy organdarǵa tıisti qarajat bólinip, jeńildetilgen lızıngpen avtobýstar satyp alynady. Tasymaldaýshylar avtobýstardyń jartysyn Úkimet kómegimen, jartysyn tasymaldan tapqan paıdasy arqyly satyp alyp jatyr. Munan bólek, jergilikti atqarýshy organdar árbir áleýmettik mańyzy bar tasymalǵa bıýdjetten sýbsıdııa bóledi. Bul jyldan jylǵa ulǵaıyp keledi. Sonyń arqasynda avtobýstar jańartylyp otyr, — dedi ol Úkimet otyrysynan keıingi baspasóz máslıhatynda BAQ ókilderiniń saýalyna oraı.

Sonymen qatar ol eski avtobýstar jolaýshylar tasymalyna shyǵar aldynda arnaıy tekserýden ótetin aıtty.

— Birinshiden, Jolaýshylardy tasymaldaıtyn avtobýstar jylyna 2 ret tehnıkalyq baıqaýdan ótedi. Ótpegen jaǵdaıda jolaýshylar tasymaldaý qyzmetine jiberilmeıdi. Ekinshiden, kez kelgen avtobýs baǵdarǵa shyǵatyn kúni, ıaǵnı kún saıyn avtoparkte jeńildetilgen tehnıkalyq baıqaýdan ótkiziledi. Qaýipsizdikke qatysty máseleniń bári qarastyrylǵan, — dedi Selim Qýanyshuly.

Buǵan deıin Almatyda taǵy 166 eski avtobýs aýktsıonǵa shyǵarylǵanyn jazǵan edik.