Halyqaralyq jýrnalıstıka mektebiniń alǵashqy túlekteri dıplomdaryn aldy
ASTANA.KAZINFORM — Astanada Qazaqstan Respýblıkasy Prezıdentiniń Teleradıokesheni men Maqsut Nárikbaev ýnıversıtetiniń birlesken jobasy — Halyqaralyq jýrnalıstıka mektebiniń alǵashqy túlekteri dıplom aldy, dep habarlaıdy Kazinform agenttiginiń tilshisi.
Halyqaralyq jýrnalıstıka mektebi tek teorııaǵa ǵana emes, halyqaralyq tájirıbege de súıenedi. Buny 2024 jyldyń sáýir aıynda Al Jazeera telearnasymen ótken bilim berý aptalyǵy rastaıdy. Halyqaralyq yntymaqtastyq jańa oqý jylynyń basynan bastap jalǵasady — stýdentter men oqytýshylarǵa Al Jazeera sarapshylary ǵana emes, sonymen qatar Qytaı medıa korporatsııasy CMG mamandary da dáris oqıdy.
Halyqaralyq jýrnalıstıka mektebiniń «Jýrnalıstıka: analıtıka jáne zertteý» biregeı baǵdarlamasynyń alǵashqy túlekteri 25 adam boldy. Baǵdarlama tórt negizgi baǵyttan turdy: jýrnalıstıka, quqyq, ekonomıka jáne IT. Oqytý qazaq jáne orys tilderinde júrgizildi. Barlyq túlekter Qazaqstannyń jetekshi redaktsııalarynda tájirıbeden ótip, 11 BAQ-ta jarııalanǵan medıa jobalardy júzege asyrdy.
Dıplom tapsyrý saltanaty Maqsut Nárikbaev atyndaǵy ýnıversıtet ǵımaratynyń janyndaǵy ashyq alańda saltanat pen qoldaý jaǵdaıynda ótti.
Halyqaralyq jýrnalıstıka mektebiniń birinshi túlekterine dıplomdardy Qazaqstan Respýblıkasy Prezıdentiniń Teleradıokesheni dırektorynyń orynbasary Asqar Jaldınov, MUÝ basqarma tóraǵasy Talǵat Nárikbaev jáne Parlament Májilisiniń depýtaty Ashat Aımaǵambetov tabys etti.
Bıylǵy jyly oqý ornyn barlyǵy 828 stýdent bitirdi, onyń ishinde 698 bakalavr dárejesi jáne 130 magıstratýra ıegeri. Jas mamandardyń eń kóp bóligi Quqyq joǵary mektebin (271 bakalavr jáne 69 magıstr) bitirdi. Túlekterdi Qazaqstan Respýblıkasynyń Ǵylym jáne joǵary bilim mınıstri Saıasat Nurbek quttyqtady.
Merekeniń kórkin keshtiń hedlaıneri ALEM oryndaýshysynyń óneri tolyqtyrdy.