Halyqaralyq júk tasymaly blankileri otandyq kólik kompanııalary arasynda tıimdi bóline me

Kólik vıtse-mınıstri Sátjan Ablalıev halyqaralyq júk tasymalyna ruqsat beretin blankilerdi otandyq kólik kompanııalary arasynda tıimdi bólý úshin qandaı sharalar qabyldanyp jatqanyn aıtty, dep habarlaıdy Kazinform.

Búgin Úkimet otyrysynda Premer-Mınıstr Álıhan Smaıylov vıtse-mınıstrden: «Halyqaralyq júk tasymalyna ruqsat beretin blankilerdi otandyq kólik kompanııalary arasynda tıimdi bólý úshin qandaı sharalar qabyldanýda?», - dep suraǵan edi.

Vıtse-mınıstrdiń aıtýynsha, búginde mınıstrlik ruqsat qaǵazdaryn berýdiń jańa júıesin engizý boıynsha jumys istep jatyr.

«Bıyldan bastap Qytaı elimen kirý qujattaryn Qytaıda, shekarada naqty taratý tásili engizildi. Ol óziniń nátıjesin kórsetti. Eger aldyńǵy jyldary elimiz Qytaımen 50 myńǵa jýyq ruqsat almasqan bolsa, bıyldyń ózinde 110 myńǵa deıin artty. Endi osy tájirıbeni Ózbekstanmen shekarada da engizý josparlanyp otyr. Basqa eldermen qujattardy avtomatty túrde engizý jumysy jalǵasýda. Ony Shekara qyzmetiniń «Búrkit» júıesi arqyly onlaın baqylaý máselesi pysyqtalýda. Osy sharalardyń bári ruqsat qaǵazdardy tasymaldaýshylarǵa naqty qajet bolǵanda berýge múmkindik jasaıdy jáne ashyqtyǵyn qamtamasyz etedi», - dedi Sátjan Ablalıev.