Halyqaralyq júk tasymaldaýshylar úshin jańa tetik engiziledi
ASTANA. KAZINFORM – 2025 jyldyń 15 qańtarynan otandyq tasymaldaýshylar úshin júkterdi halyqaralyq tasymaldaýǵa jańa tetik engiziledi. Bul jaıynda Májilis depýtattarynyń saýalyna Premer-Mınıstrdiń birinshi orynbasary Roman Sklıardyń jaýabynda aıtylǵan.
- Búgingi tańda Kólik mınıstrligi Júkterdi halyqaralyq tasymaldaýǵa sheteldik ruqsat blankilerin (munan ári - ShRB) berýdiń buryn qoldanylyp júrgen tártibiniń ornyna barlyq otandyq tasymaldaýshylar úshin qandaı da bir shekteýsiz teń qoljetimdilikti ashatyn jáne neǵurlym básekege qabiletti orta qalyptastyratyn jańa tetik engizip jatyr. Osylaısha, ótinimdi qaraý merzimin eki jumys kúninen 40 mınýtqa deıin qysqartyp jáne tólegennen keıin birden bere otyryp, ShRB berý kezinde adamı faktor tolyǵymen alynyp tastalady. Bul rette ShRB alýǵa suraý salý árbir avtokólik quralyna jeke beriledi, - dedi birinshi vıtse-premer.
Onyń atap ótýinshe, avtokólik quraldarynyń kirýin jáne shyǵýyn baqylaý «Búrkit» aqparattyq júıesi arqyly júzege asyrylady. Bul ShRB-niń kóleńkeli naryqta qaıta satylýyn boldyrmaýdy qamtamasyz etedi.
- Sonymen qatar, Kólik mınıstrligi «Atameken» Ulttyq kásipkerler palatasymen birlesip, «Ákimshilik quqyqbuzýshylyq týraly» kodekske ShRB qaıtarýdyń belgilengen merzimderin (30 kúnnen astam) buzǵany úshin jaýapkershilikti engizý bóliginde túzetýler ázirledi. Qazirgi ýaqytta osy túzetýler boıynsha retteýshilik áserdi taldaý jobasy Kásipkerlik qyzmetti retteý máseleleri jónindegi vedomstvoaralyq komıssııanyń otyrysynda maquldandy, - dedi Roman Sklıar.
Jaýapqa qosymsha berilgen anyqtamaǵa sáıkes, «Qazaqstan Respýblıkasynyń halyqaralyq qatynastaǵy avtomobılmen tasymaldaýlarynda ruqsat berý júıesin qoldaný qaǵıdalaryn bekitý týraly» Investıtsııalar jáne damý mınıstriniń mindetin atqarýshynyń 2015 jylǵy 27 naýryzdaǵy № 353 buıryǵynyń keıbir qurylymdyq elementteriniń áreketterin toqtata turý týraly Kólik mınıstriniń 2024 jylǵy 8 qazandaǵy № 324 buıryǵy 2025 jylǵy 15 qańtardan bastap kúshine enedi.
Aıta keteıik, Qazaqstanda júk tasymaldaý tarıfteri ótken jylmen salystyrǵanda 3,8% ósti.