Halyqaralyq izdeýdegi 11 qylmysker Qazaqstannan tys jerlerde ustaldy
ASTANA. KAZINFORM — ІІM izdeýde júrgen qylmyskerlerdi elden tys jerde ustaýdy jalǵastyrýda, dep habarlaıdy Polisia.kz
ІІM TMD elderiniń quqyq qorǵaý organdarymen ózara is qımyl jasaı otyryp, izdeýde júrgen qylmyskerlerdiń ornalasqan jerin anyqtaý jáne olardy ustaý jónindegi jumysty jalǵastyrýda. Mysaly, Máskeý qalasynda 28 jastaǵy qazaqstandyq azamat ustaldy. Ol ótken jyldyń sáýir-qazan aılary aralyǵynda Almatyda jergilikti turǵyndardan qymbat smartfondardy satý syltaýymen alyp, keıin izin sýytqan. Osylaısha ol jeti adamdy aldaǵan. Shyǵyn 32 mln teńgeden asty.
Reseı Federatsııasynyń Lıýbertsy qalasynda Shymkenttiń polıtsııa departamentiniń qyzmetkerleri sheteldik áriptesterimen birlesip, 36 jastaǵy Ózbekstan azamatyn ustady. Kúdikti áıel 2014 jyly shymkenttik turǵynǵa tıesili jer ýchaskesin aldap satyp jibergen. Jábirlenýshige keltirilgen zalal somasy 14 myń dollardy qurady.
— 2025 jyldyń basynan bastap Qazaqstannan tys jerlerde 11 qylmysker tabyldy. Bizdiń elimizdiń aýmaǵynda basqa elderdiń quzyretti organdary úshin 44 qylmysker ustaldy, — delingen habarlamada.
Eske salsaq, budan buryn halyqaralyq izdeýde júrgen sheteldik Aqtóbe oblysynda ustalǵanyn habarlaǵan edik.