Halyqaralyq izdeýde bolǵan esirtki tasymaldaýshy Samarada ustaldy

ASTANA. KAZINFORM — Esirtki saýdasy úshin 20 jyl boıy jasyrynyp kelgen qazaqstandyq Reseıden ekstradıtsııalandy, dep habarlaıdy Bas prokýratýranyń baspasóz qyzmeti.

Qazaqstan Respýblıkasynyń Bas prokýratýrasy Reseı Federatsııasynan qylmystyq qoǵamdastyqqa qatysqany, asa iri mólsherde esirtki zattarynyń zańsyz aınalymy men olardyń kontrabandasy úshin qylmystyq jaýaptylyqqa tartý maqsatynda Qazaqstan azamatyn ekstradıtsııalady.

Atalǵan tulǵa 2003 jyly Ózbekstannan Qazaqstan arqyly Reseıge geroın men opıı jetkizýmen aınalysqan qylmystyq qaýymdastyqtyń quramyna kirgen. Kúdikti esirtkini tasymaldaý, saqtaý jáne qylmystyq qaýymdastyqtyń basqa múshelerine ótkizý qyzmetterin atqarǵan. 2003 jyly Qyzylorda jáne Qaraǵandy oblystarynda júrgizilgen arnaıy operatsııalar barysynda qylmyskerlerdiń bir bóligi ustalyp, olardan 35 kg geroın men 28 kg opıı alynǵan. Ustalǵan adamdar keıin sottalǵan, al kúdikti quqyq qorǵaý organdarynan qashyp úlgerip, halyqaralyq izdeýge jarııalanǵan.

— 20 jyl boıy izdeýde júrgen ol ótken jyldyń jeltoqsanynda Reseıdiń Samara oblysynda ustalyp, Qazaqstan Bas prokýratýrasynyń suraýy boıynsha elge ekstradıtsııalandy. Qazirgi tańda ol tergeý ızolıatoryna qamaldy. Aıyptalǵan qylmystardy jasaǵany úshin múlki tárkilenip, 10 jyldan 15 jylǵa deıin bas bostandyǵynan aıyrý jazasy qarastyrylǵan, — delingen habarlamada. 

Buǵan deıin alaıaqtyq jasap, izdeýde bolǵan Qazaqstan azamaty Saýd Arabııasynan ekstradıtsııalanǵanyn jazdyq.