Halyqaralyq volonterler jyly naqty jetistikter kezeńine aınalady — Aıda Balaeva
ASTANA. KAZINFORM — Árbir úshinshi qazaqstandyq volonterlik bastamalarǵa qatysyp otyr. Bul týraly elordadaǵy Óńirlik ekologııalyq sammıt aıasyndaǵy volonterlik jáne ekologııalyq is-sharalar sessııasynda QR Premer-mınıstriniń orynbasary — Mádenıet jáne aqparat mınıstri Aıda Balaeva málim etti.
Onyń aıtýynsha, el azamattarynyń volonterlik qyzmetke jumylýy artyp keledi. Búginde árbir úshinshi qazaqstandyq volonterlik bastamalarǵa qatysyp otyr, al volonterlik qyzmet týraly habardar bolǵan halyqtyń úlesi 89 paıyzǵa jetti. Júıeli jumystardyń nátıjesinde volonterlik uıymdardyń sany úsh esege, eriktiler toptary on esege, belsendi eriktiler sany 6 esege ósti.
A. Balaeva jumysqa ornalasý jáne oqý oryndaryna qabyldaý kezinde volonterlik qyzmetti esepke alý, sondaı-aq volonterlerdiń ómirin saqtandyrý máseleleri qarastyrylyp jatqanyn atap ótti. Osy sharalardy júzege asyrý úshin tıisti zańnamalyq túzetýlerdi qabyldaý josparlanǵan.
— Ózderińizge belgili, 2026 jyl Tsıfrlandyrý jáne jasandy ıntellekt jyly dep jarııalandy. Osy oraıda jyl sońyna deıin volonterdiń tsıfrlyq pasportyn engizýdi josparlyp otyrmyz, — dedi Premer-mınıstrdiń orynbasary.
Onyń sózine qaraǵanda, keıingi bes jylda 10 myń volonterdiń qatysýymen Araldyń qurǵaǵan tabanynda 1 mln gekter jerdi qamtı otyryp, sekseýil kósheti egildi.
— Biz halyqaralyq seriktestermen birlesken jumysqa, ásirese volonterlik saladaǵy tujyrymdamalyq tásilderdi qalyptastyrýǵa erekshe mán berip kelemiz. BUU-nyń Eriktiler baǵdarlamasymen ózara tájirıbe almasý, ozyq tájirıbelerdi engizýge jáne birlesken jobalardy júzege asyrýǵa jol ashady. Osy oraıda Birikken Ulttar Uıymy Eriktiler baǵdarlamasynyń delegatsııasyn, sondaı-aq búginde Qazaqstandaǵy BUU júıesiniń túrli agenttikterinde qyzmet atqaryp júrgen Japonııa, Koreıa Respýblıkasy jáne Aýǵanstan elderinen kelgen eriktilerge erekshe yqylasymdy jetkizgim keledi. Bizdiń bekem baılanysymyz aldaǵy ýaqytta da nyǵaıyp, naqty nátıjelerge ulasatynyna senimim mol. Halyqaralyq volonterler jyly bárimiz úshin naqty jetistikter men jańa tabysty bastamalardyń kezeńine aınalatynyna kúmánim joq, — dedi Aıda Balaeva.
Budan buryn habarlanǵandaı, búgin elordadaǵy Óńirlik ekologııalyq sammıt aıasyndaǵy volonterlik jáne ekologııalyq is-sharalar sessııasyna qatysyp jatqan otandyq jáne sheteldik mamandarǵa arnap Memleket basshysy arnaıy quttyqtaý hatyn joldady.
Aıta keteıik, bıyl ekologııalyq volonterlikti damytý baǵdarlamasy qabyldanady.
Volonterdiń tsıfrlyq pasporty jyl sońyna deıin engiziledi.
