Halyqaralyq valıýta qory jahandyq ekonomıkalyq ósý boljamyn 3 paıyzǵa deıin kóteredi

ASTANA. KAZINFORM — Halyqaralyq valıýta qory (HVQ) seısenbi kúni 2025 jylǵa arnalǵan álemdik ekonomıkalyq ósim boljamyn 3 paıyzǵa deıin joǵarylatty. Bul – sáýir aıynda jasalǵan boljaýdan 0,2 paıyzdyq tarmaqqa joǵary, dep habarlaıdy Sınhýa.

HVQ-nyń jańartylǵan «Álemdik ekonomıkanyń damý perspektıvalary» (World Economic Outlook) baıandamasyna sáıkes, 2025 jyly damýshy naryqtary bar jáne damyp kele jatqan elderdiń ekonomıkasynyń ósimi 4,1 paıyz bolady dep kútilýde. Bul – sáýirdegi boljamnan 0,4 paıyzdyq tarmaqqa artyq.

Damyǵan elder úshin de ósim boljamy 1,4 paıyzdan 1,5 paıyzǵa deıin qaıta qaraldy.

Atap aıtqanda, AQSh, Eýroaımaq, Japonııa, Ulybrıtanııa, Kanada, Qytaı, Úndistan, Brazılııa, Meksıka, Saýd Arabııasy jáne Nıgerııa sııaqty elderdiń ekonomıkalyq ósimine qatysty boljamdar jaqsartyldy.

Qujatta atap ótilgendeı, jyldyq boljamnyń aıtarlyqtaı qaıta qaralyp, joǵarylaýyna birneshe faktorlar áser etken. Atap aıtqanda: ımporttaýshylardyń kedendik baj salyǵynyń kóterilýine deıin taýar jetkizilimin aldyn ala arttyrýy; AQSh-taǵy ortasha tarıf mólsherlemeleriniń sáýir aıynda jarııalanǵan deńgeıden tómen bolýy; AQSh dollarynyń álsireýine baılanysty qarjylyq jaǵdaıdyń jaqsarýy; sondaı-aq birqatar iri memlekette salyqtyq yntalandyrý sharalarynyń keńeıýi.

Aıta ketelik Halyqaralyq valıýta qory Qazaqstan ekonomıkasynyń damý perspektıvalaryn baǵalaǵan edi.