Halyqaralyq valıýta qory Qazaqstannyń makroekonomıkalyq saıasatyna oń baǵa berdi

Onda HVQ sarapshylar tobynyń Qazaqstan ekonomıkasynyń sońǵy úrdisterin, júrgizilip jatqan reformalardyń basymdyqtaryn jáne odan ári damý perspektıvalaryn zerdeleý jónindegi qyzmetiniń aldyn ala qorytyndylary qaraldy.

Premer-mınıstr Oljas Bektenov seriktestiktiń mańyzdylyǵyna toqtala otyryp, Qazaqstannyń ekonomıkalyq saıasatyn jetildirýdegi saraptamalyq súıemeldeýdiń rólin atap ótti. Qazaqstanda qabyldanǵan jańa Konstıtýtsııa ártaraptandyrylǵan ornyqty ekonomıkany damytý úshin ınstıtýtsıonaldyq negiz qalaıdy. Prezıdent Qasym-Jomart Toqaevtyń tapsyrmalaryna sáıkes ekonomıkalyq jańǵyrtýdyń keshendi kún tártibi júzege asyrylyp jatyr.

— Biz Qazaqstannyń ekonomıkalyq damýynda mańyzdy ról atqaratyn Halyqaralyq valıýta qorymen áriptestigimizdi joǵary baǵalaımyz. Bul dıalog HVQ-nyń turaqty mıssııalary, maqsatty keńesteri jáne memlekettik organdarǵa kórsetiletin tehnıkalyq kómegi aıasynda jalǵasýda. Aǵymdaǵy mıssııanyń qorytyndylary boıynsha usynymdar elimizdiń makroekonomıkalyq jáne makroprýdentsıaldyq saıasatyn odan ári jetildirý úshin qundy baǵdar bolady dep senemin, — dep atap ótti Premer-mınıstr.

HVQ-nyń Qazaqstan boıynsha mıssııasynyń basshysy Amına Laresh makroekonomıkalyq turaqtylyqty qamtamasyz etý jáne ınflıatsııalyq qysymdy tómendetý boıynsha memleket qabyldap jatqan sharalardyń mańyzdylyǵyn atap ótti. Sondaı-aq Úkimettiń, Ulttyq banktiń jáne Qarjy naryǵyn retteý jáne damytý agenttiginiń birlesken is-qımyl baǵdarlamasyn júzege asyrýdyń mańyzdylyǵy atap ótildi.

— Búginde Qazaqstan ekonomıkasy damýynyń oń dınamıkasyn atap ótýge bolady. Munaı jetkizilimine baılanysty syrtqy faktorlardyń tıimdi ótemaqysy nátıjesinde tólem balansynyń jaǵdaıy jaqsarýda, ekonomıka turaqtylyqty kórsetýde. Sondaı-aq ekonomıkalyq saıasat pen qabyldanyp jatqan sheshimder júıeli túrde jetildirilip kele jatyr. Makroekonomıkalyq turaqtandyrýǵa yqpal etetin júrgizilip jatqan aqsha-nesıe saıasatyn oń baǵalaımyz. Ekonomıkalyq ósýdiń joǵary qarqynyn saqtaı otyryp, ınflıatsııalyq qysymnyń birtindep tómendeýi baıqalady. Biz Úkimettiń, Ulttyq banktiń jáne Qarjy naryǵyn retteý men damytý jónindegi agenttiktiń birlesken is-qımyl josparyn qabyldaýyn quptaımyz jáne ekonomıkalyq saıasatty júzege asyrýǵa úılestirilgen kózqaras makroekonomıkalyq turaqtylyqty odan ári nyǵaıtýǵa jáne Qazaqstan ekonomıkasynyń turaqty damýyna yqpal etedi dep senemiz, — dedi Amına Laresh.

Qor sarapshylary ekonomıkalyq ósimniń turaqtylyǵyn atap ótti. Óńdeý ónerkásibin, qyzmet kórsetý salalaryn, kólik jáne qurylys sektorlaryn damytý boıynsha júıeli sharalar munaı óndirý kóleminiń qysqarýynyń ornyn toltyryp jatyr. Inflıatsııa qarqynyn báseńdetý, salyqtyq ákimshilendirýdi jaqsartý jáne fıskaldyq saıasatty jetildirý baǵyttarynda ilgerileý baıqalyp otyr. Bul baǵytta ınflıatsııalyq táýekelderdi odan ári tómendetý jáne kvazıfıskaldyq saıasatty jaqsartý boıynsha birqatar usynys aıtyldy.

Talqylaýǵa Prezıdent keńesshisi — Strategııalyq josparlaý jáne reformalar agenttiginiń tóraǵasy Áset Erǵalıev, qarjy mınıstri Mádı Takıev, ulttyq ekonomıka birinshi vıtse-mınıstri Azamat Ámrın, Ulttyq bank tóraǵasynyń orynbasary Álııa Moldabekova qatysty.

Kezdesý qorytyndysy boıynsha Premer-mınıstr Oljas Bektenov Amına Laresh pen HVQ komandasyna reformalardy júzege asyrýda qoldaý kórsetkeni úshin alǵysyn bildirdi. Qazaqstan Úkimeti ózara tıimdi áriptestikti odan ári nyǵaıtýǵa baǵyttalǵan syndarly dıalogke ashyq. Sapar qorytyndysy boıynsha Halyqaralyq valıýta qorynyń usynystary salalyq memlekettik organdar tarapynan qaralady.

Buǵan deıin Senat Almatyda Halyqaralyq valıýta qorynyń óńirlik ortalyǵyn qurý týraly zańdy maquldady.