Halyqaralyq valıýta qory Qazaqstan ekonomıkasynyń damý perspektıvalaryn baǵalady

ASTANA. KAZINFORM — 15-23 mamyr aralyǵynda Qazaqstan Halyqaralyq valıýta qorynyń mıssııasyn qabyldady. Sapar qorytyndysy boıynsha qorytyndy málimdeme jarııalandy, ol aǵymdaǵy ekonomıkalyq jaǵdaıǵa sholý, ekonomıkanyń damý perspektıvalary men negizgi usynymdardy qamtıdy.

— Mıssııanyń pikirinshe, Qazaqstanda qyzmet kórsetý, kólik, qurylys, óńdeý jáne óndirý ónerkásibi sektorlaryndaǵy joǵary belsendilik aıasynda joǵary ekonomıkalyq ósý saqtalyp otyr. Sondaı-aq, memlekettik ınfraqurylymdyq ınvestıtsııalardyń ósýi men tsıfrlyq tehnologııalar, JI, agroónerkásiptik keshen jáne logıstıka salasyndaǵy ınvestıtsııalyq jobalardyń iske asyrylýy baıqalady, — delingen Ulttyq bank habarlamasynda.

Ekonomıka úshin táýekel týdyrýy múmkin faktorlardyń qatarynda iri ınfraqurylymdyq jobalardy iske asyrýdaǵy kidiristerge baılanysty ósýdiń yqtımal baıaýlaýy, ınflıatsııalyq qysymnyń kúsheıýi jáne saýda protektsıonızminiń kúsheıýi aıasynda belgisizdik baıqalady. Qosymsha táýekelderge munaı baǵasynyń tómendeýi jáne Qazaqstannyń saýda áriptes elderinde ósýdiń baıaýlaýy jatady.

Budan bólek, Halyqaralyq valıýta qorynyń sarapshylary osy jyldyń sáýir aıynda ınflıatsııanyń údeýin atap ótti jáne onyń 2025 jyly 10,5% deńgeıinde saqtalýyn boljaıdy. Halyqaralyq valıýta qory ınflıatsııany Ulttyq banktiń nysanaly deńgeıine deıin tómendetý maqsatynda tejeýshi aqsha-kredıt saıasatynyń mańyzdylyǵyn atap ótti.

Halyqaralyq valıýta qorynyń mıssııasy makroprýdentsıaldyq saıasatty qatańdatý josparlaryn oń baǵalady, bul tutynýshylyq nesıeleýdiń ósýi aıasynda qarjylyq turaqtylyq úshin táýekelderdi azaıtýǵa yqpal etýi kerek.

Halyqaralyq valıýta qory mıssııasynyń IV baby boıynsha sapary osy jyldyń qyrkúıeginde ótedi.

Aıta ketelik eń joǵarǵy jyldyq ınflıatsııa Astana qalasynda tirkelgen edi.