Halyqaralyq uıymdar Qazaqstannyń ulttyq statıstıka júıesine joǵary baǵa berdi
ASTANA. KAZINFORM — «Ulttyq statıstıkalyq júıelerdiń tsıfrlyq transformatsııasy» forýmynyń resmı ashylýyna, Qazaqstandaǵy memlekettik statıstıkanyń 105 jyldyq mereıtoıyna oraı, BUU, BUU EEK, EYDU, Dúnıejúzilik bank, Azııa damý banki, ıÝNIDO, ıÝNFPA ókilderi, sondaı-aq memlekettik organdar, ǵylymı jáne saraptamalyq qaýymdastyq ókilderi qatysty. Bul týraly Ulttyq statıstıka bıýrosy málim etti.
Forýmda sóz sóılegen Dúnıejúzilik banktiń ókili Andreı Mıhnev Qazaqstan sońǵy jyldary eleýli progreske qol jetkizip, tabysy ortadan joǵary elge aınalǵanyn atap ótti. Bul áserli nátıjeler eldiń ekonomıkalyq ósim men damýǵa degen umtylysyn aıqyn dáleldeıtiniń aıtty.
Qazaqstannyń Ulttyq statıstıka bıýrosy Ortalyq Azııa óńirinde kóshbasshy retinde erekshelenedi. Innovatsııalyq kózqarasy Qazaqstandaǵy derekterdiń sapasy men qoljetimdiligin arttyrýǵa yqpal etip qana qoımaı, kórshi elderdi de osyndaı jańashyldyqtardy engizýge yntalandyrdy. Ozyq tájirıbemen belsendi almasý arqyly Bıýro Qazaqstannyń óńirlik statıstıkalyq ortalyq retindegi pozıtsııasyn nyǵaıtty.
— Aldaǵy kezeńge kóz júgirtsek, Dúnıejúzilik bank Ulttyq statıstıka bıýrosyn qoldaýǵa degen berik ustanymyn saqtaıdy. Tıimdi memlekettik basqarý men ornyqty damýdyń negizi — senimdi, táýelsiz jáne ınnovatsııalyq statıstıkalyq júıe ekenine biz nyq senemiz. Qazaqstan statıstıkalyq ınnovatsııalar salasynda kóshbasshylyqty saqtap, derekter eldiń ilgerileýi men órkendeýiniń mańyzdy qozǵaýshy kúshine aınalýy úshin biz Bıýronyń órshil maqsattaryn odan ári qoldaımyz, — dedi A. Mıhnev.
BUU-nyń Qazaqstandaǵy Turaqty úılestirýshisi Sarango Radnaragcha Qazaqstandy úsh jyl ishinde tolyq tsıfrlyq memleketke aınaldyrý jónindegi Memleket basshysy Qasym-Jomart Toqaev jarııalaǵan strategııalyq mindet el úshin batyl baǵdar ekenin atap ótip, Birikken Ulttar Uıymy bul kózqarasty júzege asyrýǵa qoldaý kórsetýge daıyn ekenin aıtty.
— Ulttyq statıstıka bıýrosyn 105 jyldyq mereıtoıymen quttyqtaımyn. Bıýro — TDM-dy ilgeriletý isinde BUU-nyń strategııalyq áriptesi. Kóp jyldar boıy agenttikterimiz ártúrli baǵyttarda tyǵyz yntymaqtastyq ornatyp keledi: 2025 jylǵy Ulttyq aýyl sharýashylyǵy sanaǵyn daıyndaý barysynda FAO-men, genderlik derekter boıynsha BUU-Áıelder qurylymymen, ulttyq statıstıkalyq júıelerdi baǵalaý boıynsha BUU EEK-pen, Kóp kórsetkishti klasterlik zertteý (MICS) aıasynda ıÝNISEF jáne ıÝNFPA-men, halyq sanynyń boljamy boıynsha ıÝNFPA-men jumys atqaryldy, sondaı-aq 2021 jyly halyq jáne turǵyn úı qory sanaǵyn tolyqtaı qaǵazsyz formatta ótkizýge qoldaý kórsetildi. Bul tek birneshe mysal ǵana. Bizdiń yntymaqtastyǵymyz aldaǵy ýaqytta da tereńdeı beretinine senimdimiz, — dedi ol.
Azııa damý bankiniń ókili Ýtsav Kýmar qazirgi ózara baılanysqan álemde ornyqty statıstıkalyq júıelerdiń mańyzy artyp kele jatqanyn, olardyń elderge ulttyq jáne jahandyq maqsattar, sonyń ishinde Turaqty damý maqsattaryna qol jetkizý barysyn ólsheýge múmkindik beretinin atap ótti.
— Agenttik pen Ulttyq statıstıka bıýrosy basshylyǵy jáne qyzmetkerleriniń alǵyr ári strategııalyq kózqarasyn erekshe atap ótkim keledi. Olar Memleket basshysy Qasym-Jomart Toqaev belgilegen Qazaqstannyń ulttyq damý kórinisine tolyq saı keledi. Ásirese statıstıka salasyna jasandy ıntellekt pen tsıfrlandyrýdy engizý baǵytyndaǵy Bıýronyń ashyqtyǵyn atap ótken jón. Ulttyq statıstıka bıýrosynyń damý seriktesterimen, atap aıtqanda ADB, ıÝNISEF jáne ıÝNFPA birlesip júzege asyrǵan Mýltı-ındıkatorlyq klasterlik zertteý (MICS) aıasyndaǵy yntymaqtastyǵyn joǵary baǵalaımyn. Bul zertteý áserli nátıjeler kórsetti — úı sharýashylyqtarynyń qamtylý deńgeıi 96,3%-dy qurady, — dedi Ý. Kýmar.
Aıta keteıik, búgin Memleket basshysy statıstıka qyzmetkerlerin kásibı merekesimen quttyqtady.