Halyqaralyq uıymdar Qazaqstannyń ekologııalyq bastamalaryn qoldady
ASTANA. KAZINFORM — Memleket basshysy qorshaǵan ortany qorǵaý salasyndaǵy birqatar halyqaralyq uıymdar basshylarymen kezdesip, Ortalyq Azııadaǵy negizgi ekologııalyq bastamalardy iske asyrý joldaryn talqylady. Bul týraly Aqorda málim etti.
Qasym-Jomart Toqaev Óńirlik ekologııalyq sammıtke qatysyp, qoldaý kórsetkeni úshin delegattarǵa alǵys aıtyp, olardyń mol tájirıbesi ortaq máselelerdiń sheshimin tabýda naqty tásilderdi ilgeriletýge yqpal etetinine senim bildirdi.
— Prezıdent elimiz ornyqty damýdy qamtamasyz etý jáne bıoalýantúrlilikti qorǵaý boıynsha halyqaralyq ınstıtýttardyń qyzmetine basa mán beretinin atap ótti. Memleket basshysynyń aıtýynsha, Qazaqstan óńirlik jáne jahandyq deńgeıde ekologııalyq jaýapkershilik qaǵıdattaryn júzege asyrýdy jaqtaıdy. Elimizdiń jańa Konstıtýtsııasynda qorshaǵan ortany qorǵaý memlekettik saıasattyń negizgi qaǵıdattarynyń biri retinde aıqyndalǵan, — delingen habarlamada.
Halyqaralyq konventsııa ókilderi Óńirlik ekologııalyq sammıtti joǵary deńgeıde uıymdastyrǵany úshin Memleket basshysyna rızashylyqtaryn jetkizdi.
Olar halyq arasynda ekologııalyq sana qalyptastyrýdy kózdeıtin «Taza Qazaqstan» baǵdarlamasyn júzege asyrýdy quptaıtyndaryn málimdedi. Sonymen qatar mártebeli meımandar elimizdiń klımat jáne sý problemalaryn sheshýge qatysty jahandyq bastamalaryna qoldaý kórsetti.
Kezdesýge BUU Bas hatshysynyń orynbasary — BUU qorshaǵan orta baǵdarlamasynyń (UNEP) atqarýshy dırektory Inger Andersen, Joıylyp ketý qaýpi tóngen jabaıy faýna jáne flora túrlerimen halyqaralyq saýda týraly konventsııanyń (CITES) Bas hatshysy Ivonn Igero, BUU-nyń bıoalýantúrlilik jónindegi konventsııasynyń atqarýshy hatshysy Astrıd Shomaker, Bazel, Rotterdam jáne Stokgolm konventsııalarynyń atqarýshy hatshysy Rolf Paıe qatysty.
Buǵan deıin Prezıdent Eýropadaǵy qaýipsizdik jáne yntymaqtastyq uıymynyń Bas hatshysyn qabyldady.
