Halyqaralyq uıymdar Azııadaǵy yntymaqtastyqty tereńdetý baǵytyn qoldady
ASTANA. KAZINFORM - Astanada Azııadaǵy ózara is-qımyl jáne senim sharalary jónindegi keńestiń (AÓSShK) Hatshylyǵy uıymdastyrǵan dóńgelek ústel ótti. Oǵan BUU júıesiniń atqarýshy qurylymdary men Azııadaǵy jetekshi óńirlik uıymdardyń ókilderi qatysty.
Іs-shara AÓSShK-niń 20 jyldyǵyna arnalǵan baǵdarlamanyń bir bóligi bolyp, qatysýshylardyń kópjaqty yntymaqtastyq pen óńirlik kún tártibin damytýǵa beıildigin taǵy bir márte rastady.
Kezdesýge BUU qurylymdary, atap aıtqanda Ortalyq Azııa úshin BUU-nyń Preventıvtik dıplomatııa jónindegi óńirlik ortalyǵy, Halyqaralyq kóshi-qon uıymy (HKQU) jáne BUU-nyń Esirtki jáne qylmys jónindegi basqarmasy qatysty.
Óńirlik uıymdar tarapynan Shanhaı yntymaqtastyq uıymy (ShYU), onyń Óńirlik terrorızmge qarsy qurylymy, sondaı-aq Eýrazııalyq ekonomıkalyq odaq (EAEO) ókilderi qatysty. Baqylaýshy retinde Arab memleketteri lıgasy, Túrki memleketteri Parlamenttik Assambleıasy (TÚRKPA), Azııadaǵy yntymaqtastyq dıalogy (AYD), Táýelsiz Memleketter Dostastyǵy (TMD), Parsy shyǵanaǵyndaǵy arab memleketteri yntymaqtastyq keńesi jáne Túrki memleketteri uıymy (TMU) qatysty.
Sondaı-aq pikirtalasqa Úndistan men Qazaqstannyń saraptamalyq ortalyqtarynyń ókilderi jáne AÓSShK-niń burynǵy basshylary qosyldy.
AÓSShK Bas hatshysy, elshi Qaırat Sarybaı qazirgi halyqaralyq ahýaldyń kúrdelene túskenin atap ótip, klımattyq táýekelderden bastap jetkizý tizbekterindegi irkilisterge deıingi transulttyq syn-qaterler kópjaqty úılestirýdi kúsheıtýdi talap etetinin aıtty. Onyń sózinshe, mundaı máselelerdi birde-bir memleket nemese uıym jeke-dara sheshe almaıdy.
Kezdesýde atqarýshy qurylymdardyń róline erekshe nazar aýdaryldy. Olar saıası málimdemelerdi naqty nátıjelerge aınaldyrýdy qamtamasyz etýi tıis ekeni aıtyldy. AÓSShK seriktes uıymdarmen praktıkalyq ózara is-qımyldy keńeıtýge daıyn ekenin málimdedi.
Birinshi sessııa barysynda qatysýshylar ósip kele jatqan jahandyq belgisizdik jaǵdaıynda halyqaralyq yntymaqtastyq tetikterin jańǵyrtý qajettigin talqylady. AÓSShK Azııadaǵy qaýipsizdiktiń ınklıýzıvti arhıtektýrasyn qalyptastyrýǵa yqpal etetin mańyzdy alań retinde ataldy. Sonymen qatar kólik, tsıfrlyq jáne energetıkalyq baılanystardy monıtorıngteýge arnalǵan óńirlik observatorııa qurý usynysy kóterildi.
Ekinshi sessııa BUU men óńirlik qurylymdar arasyndaǵy ózara is-qımyl máselelerine arnaldy. Qatysýshylar qaqtyǵystardyń aldyn alý úshin kúsh-jigerdi úılestirýdiń mańyzyn atap ótip, turaqty beıbitshilik eń aldymen óńirlik deńgeıde qalyptasatynyn aıtty. Senim sharalarynyń qatarynda kóshi-qon úderisterin basqarýdaǵy ashyqtyq pen jahandyq mandattardy iske asyrý tıimdiligin arttyrý qajettigi erekshe ataldy.
Úshinshi sessııa atqarýshy qurylymdardyń yntymaqtastyqty nyǵaıtýdaǵy róline arnaldy. Onda turaqty dıalog pen áriptestiktiń ıkemdi formattarynyń mańyzy aıtylyp, ár uıymnyń ózindik ereksheligi men rólin saqtaý qajettigi atalyp ótti.
Qatysýshylar parlamenttik dıplomatııany damytý, zańnamalardy úılestirý, strategııalyq josparlaýdy jetildirý, sondaı-aq tsıfrlyq jáne ónerkásiptik yntymaqtastyqty keńeıtýdi basym baǵyt retinde belgiledi.
Jıyn qorytyndysy boıynsha halyqaralyq jáne óńirlik uıymdardyń bir-birine básekeles emes, seriktes ekeni atalyp ótti. Taraptar turaqtylyqty nyǵaıtý jáne 2030 jylǵa deıingi Turaqty damý maqsattaryna qol jetkizý úshin turaqty dıalog júrgizýdiń mańyzdylyǵyn rastady.
Eske sala keteıik, májilis AÓSShK tıimdiligin jaqsartýǵa arnalǵan qujatty qabyldaǵan edi.
