Halyqaralyq týrızm jáne meımandostyq ýnıversıtetine bıyl 680 grant bólindi
ASTANA. KAZINFORM — Qazaqstan Respýblıkasy Týrızm jáne sport mınıstrligi bólgen memlekettik bilim berý granttarynyń nátıjesinde Halyqaralyq týrızm jáne meımandostyq ýnıversıtetiniń 2025–2026 oqý jylyna arnalǵan grant ıegerleriniń tizimi jarııalandy. Bul týraly vedomstvonyń baspasóz qyzmeti málim etti.
Baıqaýǵa elimizdiń barlyq óńirinen 828 talapker qatysty. Ýnıversıtette «Týrızm», «Tynyǵý isi», «Meıramhana isi jáne qonaq úı bıznesi» baǵyttary boıynsha bilim berý baǵdarlamalary júzege asyrylady. Bıyl barlyǵy 680 grant bólindi. Qujattar 20 maýsym men 15 tamyz aralyǵynda qabyldanyp, qorytyndysy 19 tamyz kúni shyǵaryldy.
— Halyqaralyq týrızm jáne meımandostyq ýnıversıteti — elimizdegi týrızm salasyna kásibı mamandar daıarlaıtyn birden-bir joǵary oqý orny. Ýnıversıtet halyqaralyq standarttarǵa saı bilim berý baǵdarlamalaryn usynyp, qonaqjaılylyq ındýstrııasynyń damýyna úles qosatyn mamandardy daıyndaıdy. Oqý barysynda teorııalyq bilimdi tájirıbemen ushtastyrýǵa erekshe kóńil bólinedi, sondaı-aq sheteldik seriktes ýnıversıtettermen akademııalyq almasý baǵdarlamalary iske asyrylady, — delingen habarlamada.
Qazirgi ýaqytta ýnıversıtette kadrlardy daıarlaý memlekettik, orys jáne aǵylshyn tilderinde júrgiziledi. Bakalavrıat deńgeıinde 12 mamandandyrylǵan bilim berý baǵdarlamasy bar. Jalpy stýdentter sany — 2 919. 2024 jyldyń maýsymynda alǵashqy túlekter oqýyn aıaqtap, 460 stýdentke dıplom tabystaldy. Olardyń 437-i eńbek naryǵynda óz ornyn taýyp, bul kórsetkish túlekterdiń 95 paıyzyn qurady.
Ýnıversıtet bazasynda jalpy quny 360 mln teńgeni quraıtyn 5 ǵylymı joba júzege asyrylýda. Sonymen qatar ýnıversıtettiń «Bulletin of the International University of Tourism and Hospitality» atty ǵylymı jýrnaly QR Ǵylym jáne joǵary bilim mınıstrliginiń Ǵylym komıteti janyndaǵy Bilim jáne ǵylym sapasyn qamtamasyz etý komıteti usynǵan ǵylymı basylymdar tizimine endi. Bul ýnıversıtet ǵalymdarynyń ǵylymı-ádistemelik áleýetiniń joǵary deńgeıin aıǵaqtaıdy.
Bıylǵy grant ıegerleri týrızm salasynyń básekege qabiletti mamandaryna aınalyp, el ekonomıkasynyń mańyzdy baǵyttarynyń biri — týrızm ındýstrııasyn damytýǵa óz úlesin qosatyn bolady.
Al elimizde bıyl ýnıversıtetterdegi magıstratýraǵa 20 myńnan astam ótinish túsken. Grant nátıjeleri 23 tamyzda jarııalanady.