Halyqaralyq teatr kúni: Almatyda jyl basynan beri 11 myń adam teatrǵa bardy
ALMATY. KAZINFORM — 27 naýryz — Halyqaralyq teatr kúni Almaty teatrlary jyl saıyn atap ótetin dástúrli merekege aınalǵan.
Almaty ákimdiginiń málimetinshe, jyl basynan beri qalanyń úsh teatrynda qoıylǵan spektaklderge 11 myńnan astam kórermen kelgen.
«Ótken jyly úsh Almaty teatrlary barlyǵy 1320 spektakl qoıdy. Oǵan 144 myń 652 kórermen qatysty. Bıyl jyl basynan beri 116 spektaklge 11 myń 105 kórermen keldi. Teatr trýppalary balalar úılerinde jáne basqa da áleýmettik nysandarda qaıyrymdylyq kórsetilimderine qatysady, sondaı-aq Halyqaralyq áıelder kúni men Naýryz meıramyn merekeleý aıasynda qalanyń ashyq alańdarynda óner kórsetedi», — dep habarlady Almaty ákimdiginiń baspasóz qyzmeti.
Ótken jyly Qýyrshaq teatry «Qazdar-aqqýlar», «Este saqtańdar, balalar!», «Kolobok», «Mamontenoktyń mamasy», al bıyl anshlagpen qazaqstandyq tanymal boksshy Bekzat Sattarhanov týraly «Chempıon» jáne álemge tanymal Charlz Perronyń ertegisi negizinde «Etik kıgen mysyq» spektaklderiniń premeralary ótti.
Gogoldiń povesi boıynsha «Shınel», jazýshy Berdibek Soqpaqbaevtyń 100 jyldyǵyna oraı «Meniń atym Qoja», qazaq halyq ertegisi boıynsha «Aldar Kóse», aǵaıyndy Grımmderdiń álemge áıgili ertegisi negizinde «Aqshaqar jáne jeti gnom», basqa da qoıylymdar kezekte tur. Kórermender árleý jumystary oıdaǵydaı jasalǵan memlekettik Qýyrshaq teatryndaǵy zaldardyń jaılylyǵyna baǵa berip úlgerdi.
«Budan basqa, «Alataý» dástúrli óner teatrynda «Mamluk. Sultan Beıbarys» sátti premerasynan soń, «Almaty alǵashqy mahabbatym» mıýzıklin qoıý josparlanýda. Keleshekte kórermender «Estaıdyń Qorlany» jáne «Birjan sal» mýzykalyq dramalaryn, «Aqsaq qulan» baletin, sondaı-aq, «Bastapqy» kontserttik qoıylymyn tamashalaı alady. Ótken jyly «Jańa ǵasyr» jastar teatrynda «Vıı» jáne «Jekpe-jek» sekildi premeralar atap ótildi. 2024 jyly aty ańyzǵa aınalǵan akter jáne rejısser Asanáli Áshimovtiń izbasarlary Shyńǵys Aıtmatov, Robert Tomnyń shyǵarmashylyǵyna júginýge, sondaı-aq, Dýlat Isabekov pen Eldar Táshkenbaıdyń shyǵarmalaryna qoıylymdar jasaýǵa nıetti», — delinedi ákimdiktiń habarlamasynda.
Aıtý kerek, ótken jyly Almatyda mádenıet salasy qyzmetkerleriniń jalaqysy 30%-ǵa ósken.
Eske salaıyq, búgin Halyqaralyq teatr kúni. 1962 jyldan bastap atap ótiletin bul ataýly kún 1961 jyly ıÝNESKO janyndaǵy Halyqaralyq teatr ınstıtýtynyń Venada ótken 9-kongresinde bekitilgen bolatyn.
