Halyqaralyq tasymaldaý salasynda artyq talaptar kúshin joıady
Kólik prokýrorlary halyqaralyq avtomobıl tasymaldaryn retteý salasyndaǵy birqatar normatıvtik aktilerge túzetýler engizilgen Indýstrııa jáne ınfraqurylymdyq damý mınıstriniń 2022 jylǵy 13 jeltoqsandaǵy buıryǵyn zerdeledi, dep habarlaıdy Kazinform.
Ózgerister tasymaldaýdy júzege asyrýǵa, avtokólik quraldaryna ruqsat kartalarynyń qoldanylý merzimderi boıynsha talaptardy kúsheıtti jáne tutastaı alǵanda 6 myńǵa jýyq otandyq tasymaldaýshynyń jaǵdaıyn qıyndatty. Bul - beıindi mınıstrlik atalǵan buıryqty quqyqtyq ınnovatsııalardyń halyqaralyq tasymaldaýshylar mártebesine túsetin kásipkerlerdiń qyzmetine qalaı áser etetinin mindetti aldyn ala taldaýsyz qabyldaǵanynyń saldary (Kásipkerlik kodekstiń 82-baby).
"Osyǵan oraı kólik prokýratýrasy óz usynysynda jańadan qurylǵan kólik mınıstrliginiń aldyna zańdylyqtyń buzylýyn joıý jáne osy salada bıznes júrgizý úshin ruqsat berý rásimderin ońtaılandyrý jóninde sharalar qabyldaý týraly birqatar suraqtar qoıdy.
Búgingi tańda mınıstrlik basqa ýákiletti organdarmen birlesip, buıryqtan tasymaldaýshylar usynatyn artyq qujattar men málimetterdi alyp tastaýdy kózdeıtin jańa túzetýler ázirledi, óıtkeni olar týraly birqatar qajetti aqparat memlekettik organdardyń tsıfrlyq derekqorlarynda bar (qorshaǵan ortaǵa emıssııalar úshin tólem deklaratsııasy, júrgizýshilermen jasalǵan eńbek sharttarynyń kóshirmeleri jáne t.b.)", - dep jazdy vedomstvodan.
Osy túzetýlerdi qabyldaý tıisti qujattama paketin úshten birge qysqartýǵa jáne tasymaldaýshylarǵa qoıylatyn talaptardy edáýir jeńildetýge múmkindik beredi.
