Halyqaralyq tasymaldar: Qazaqstan tsıfrlyq ruqsatty Ázerbaıjan, Túrkııa jáne Qyrǵyzstanǵa engizdi
ASTANA. KAZINFORM — Kólik mınıstrligi kólik salasyn tsıfrlandyrý jumystaryn belsendi túrde jalǵastyryp otyr. Halyqaralyq tasymaldardy damytý jáne tasymaldaýshylar úshin rásimderdi jeńildetý aıasynda Ázerbaıjan, Túrkııa jáne Qyrǵyzstanmen elektrondyq ruqsat blankilerimen almasý tetigi engizildi. Bul týraly vedomstvonyń baspasóz qyzmeti málim etti.
Elektrondyq formatqa kóshý qaǵaz túrindegi blankilerden bas tartýǵa jáne ákimshilik kedergilerdi azaıtýǵa múmkindik beredi. Endi ruqsattardy rásimdeý men paıdalaný taraptardyń ıntegratsııalanǵan aqparattyq júıeleri arqyly tsıfrlyq formatta júzege asyrylady.
— Memlekettik qyzmetti elicense.kz portalyndaǵy «Kólik» bólimi arqyly alýǵa bolady. Elektrondyq ruqsat alý úshin avtokólik quraly Qazaqstan Respýblıkasynda tirkelip, halyqaralyq avtomobıl tasymaldaryn júzege asyrýǵa ruqsaty bolýy tıis. Qazaqstan kólik salasyndaǵy tsıfrlyq ózara is-qımyl geografııasyn kezeń-kezeńimen keńeıtip keledi, — delingen habarlamada.
Buǵan deıin Qytaı men Ózbekstannyń sheteldik ruqsat blankilerin tsıfrlandyrý boıynsha jumystar júrgizilgen bolatyn. Al Ázerbaıjan, Túrkııa jáne Qyrǵyzstanmen elektrondyq almasýdyń iske qosylýy salany tsıfrlyq transformatsııalaýdyń kezekti kezeńi boldy. Kólik mınıstrligi atalǵan tetikti keńeıtý jáne jańa seriktes elderdi qosý jumystaryn jalǵastyrady.
— Elektrondyq formatqa kóshýge baılanysty Kólik mınıstrligi ruqsat blankilerin úshinshi tulǵalar arqyly satyp alýǵa jol berilmeıtinin eskertedi. Berilgen elektrondyq ruqsattar týraly barlyq málimetter, onyń ishinde tasymaldaýshy men kólik quralynyń derekteri (memlekettik tirkeý nómiri) avtomatty túrde Ázerbaıjan, Túrkııa jáne Qyrǵyzstannyń aqparattyq júıelerine jiberiledi. Belgilengen tártipti buza otyryp rásimdelgen, onyń ishinde úshinshi tulǵalar arqyly alynǵan ruqsat paıdalanylǵan jaǵdaıda derekter sáıkessizdigi anyqtalady. Bul atalǵan memleketterdiń aýmaǵyna kirgizbeýige, sondaı-aq ózge de jaýapkershilik sharalarynyń qoldanylýyna ákelýi múmkin. Mınıstrlik tasymaldaýshylardy ruqsattardy tek resmı memlekettik servıster arqyly rásimdeýge jáne belgilengen tártipti qatań saqtaýǵa shaqyrady, — dep eskertti mınıstrlik tasymaldaýshy tarapty.
Aıta keteıik, Qazaqstan men Tájikstan kólik salasyndaǵy yntymaqtastyqty damytýǵa kelisti.
