Halyqaralyq tabıǵatty qorǵaý odaǵy Ortalyq Azııadaǵy sý dıplomatııasyn damytýǵa nıetti

TAShKENT. KAZINFORM – Tashkenttegi Green University bazasynda Halyqaralyq tabıǵatty qorǵaý odaǵynyń Ortalyq Azııa boıynsha keńsesi ashyldy, dep habarlaıdy Kazinform agenttiginiń menshikti tilshisi.

Atalǵan odaqtyń Tashkenttegi ókildigi Ortalyq Azııanyń 5 memleketine tán ekologııalyq máselelerdi zerdeleýmen aınalysady. Tıisinshe, olardyń saldaryn joıý jáne aldyn alý boıynsha el úkimetterine usynys ázirlep, bastamalarǵa qoldaý kórsetpek.

- Tabıǵatty qorǵaý halyqaralyq odaǵynyń keńsesi Ózbekstanmen qatar aımaqtaǵy barlyq 5 memlekettiń ekologııalyq jobalaryna qoldaý kórsetedi. Sonymen qatar bul ǵalymdar men zertteýshilerge tájirıbe almasatyn alań bolmaq, - dedi Ózbekstannyń Ekologııa mınıstri Azız Abdýhakımov.

Tabıǵatty qorǵaý halyqaralyq odaǵy Ortalyq Azııa aımaǵynda birneshe jobany iske asyrýdy josparlap otyr. Atap aıtqanda, uıym «Blue Peace Central Asia 2.0» baǵdarlamasy aıasynda óńirdegi sý dıplomatııasyn damytýǵa jáne transshekaralyq basseınderdiń ekologııalyq ahýalyn jaqsartýǵa kúsh salmaq.

Eske salaıyq, birneshe jyl buryn Halyqaralyq tabıǵatty qorǵaý odaǵy Qazaqstanda qaraquıryqtardy saqtap qalýǵa baǵyttalǵan biregeı jobany júzege asyryp bastady.