Halyqaralyq sý uıymyn qurý qandaı máselelerdi sheshýge yqpal etedi
ASTANA. KAZINFORM – Qazaqstan Respýblıkasynyń Syrtqy ister mınıstrligi, Ońtústik Afrıka Respýblıkasynyń Sý resýrstary jáne sanıtarııa mınıstrligi, sondaı-aq Halyqaralyq qatynastar jáne yntymaqtastyq mınıstrligi ókilderiniń Qazaqstan Respýblıkasynyń Ońtústik Afrıka Respýblıkasyndaǵy Elshiliginiń qatysýymen onlaın-kezdesýi ótti.
QR Syrtqy ister mınıstrligi baspasóz qyzmetiniń habarlaýynsha, kezdesý Qazaqstan Respýblıkasynyń Prezıdenti Qasym-Jomart Toqaevtyń Birikken Ulttar Uıymynyń aıasynda Halyqaralyq sý uıymyn qurý jónindegi bastamasyn talqylaýǵa arnaldy.
Kezdesý barysynda taraptar sý resýrstaryn basqarý salasyndaǵy halyqaralyq yntymaqtastyqty nyǵaıtý máseleleri boıynsha pikir almasty, sondaı-aq atalǵan bastamany ilgeriletý sheńberindegi ózara is-qımyldyń keleshegin qarastyrdy.
Halyqaralyq sý uıymyn qurý memleketter, halyqaralyq qurylymdar jáne beıindi ınstıtýttar arasyndaǵy tıimdi úılestirýdi damytýǵa, sý salasyndaǵy ózekti syn-qaterlerdi birlesip sheshýge, sý resýrstaryn ornyqty basqarýdy qamtamasyz etýge jáne ozyq tájirıbe almasýǵa yqpal etetini atap ótildi.
Kezdesýge qatysýshylar klımattyń ózgerýi jaǵdaıynda sý kún tártibiniń ósip kele jatqan mańyzdylyǵyn, sý resýrstaryn tutynýdyń ósýin jáne olardy utymdy paıdalanýdyń kelisilgen tásilderin ázirleý qajettigin atap ótti.
Ońtústik Afrıka Sý resýrstary jáne sanıtarııa mınıstrligi Halyqaralyq qatynastar departamentiniń dırektory Tshepang Malakvane ártúrli sektorlyq bastamalardan jahandyq sý kún tártibin iske asyrýda neǵurlym úılestirilgen tásilge kóshý qajettigin málimdedi, sondaı-aq qazaqstandyq bastamany odan ári zerdeleýge jáne talqylaýǵa múddeliligin rastady.
Kezdesý qorytyndysy boıynsha taraptar konsýltatsııalardy jalǵastyrýǵa jáne osy másele boıynsha halyqaralyq alańdarda ózara is-qımyldy qoldaýǵa kelisti.
Osyǵan deıin sý tapshylyǵy problemasy Ortalyq Azııa elderin biriktiretin quralǵa aınalyp jatqany týraly jazdyq.
