Halyqaralyq seriktestik bolsa, teńizge shyǵatyn joldyń joqtyǵy kedergi emes - Memleket basshysy
ASTANA. KAZINFORM – Memleket basshysy Qasym-Jomart Toqaev teńizge shyǵar joly joq damýshy elderge arnalǵan Birikken Ulttar Uıymynyń úshinshi konferentsııasynda sóılegen sózinde osylaı dedi, dep habarlaıdy Aqordanyńbaspasóz qyzmeti.
Prezıdent sózinde Qazaqstannyń seriktestermen birge aımaqtaǵy ózara baılanysty nyǵaıtý, tsıfrlyq transformatsııany ilgeriletý jáne uzaq merzimdi ári ornyqty ósimge yqpal etýdi kózdeıtin eleýli sharalar qabyldap jatqanyn jetkizdi.
– Biz Orta dáliz jáne «Soltústik – Ońtústik» baǵdary boıyndaǵy kólik joldary men tranzıt ınfraqurylymyn damytýǵa basa mán beremiz. Túpki maqsatymyz – temir joldyń, avtokólik joldarynyń, sondaı-aq avıatsııa men logıstıka ortalyqtarynyń birtutas jelisin qurý. Bul Qazaqstannyń Eýrazııalyq tranzıt haby retindegi pozıtsııasyn nyǵaıtady. Qazirgi kezde Azııa men Eýropa arasyndaǵy qurlyq arqyly tasymaldanatyn júktiń 85 paıyzǵa jýyǵy elimiz arqyly ótedi. Biz sondaı-aq tsıfrlandyrýǵa ınvestıtsııa quıyp jatyrmyz. Astana qalasynda AlemAI jasandy ıntellekt ortalyǵy quryldy. Jýyrda sýperkompıýter iske qosyldy. Ǵylymı yntymaqtastyqqa árdaıym ashyqpyz. Seriktesterimizdi qatarymyzǵa qosylýǵa shaqyramyz, – dedi Qasym-Jomart Toqaev.
Memleket basshysy óńirlik kún tártibi jóninde pikir bildirip, elderdiń múmkindigi geografııamen shektelmeıtinin Ortalyq Azııa tájirıbesi kórsetip otyrǵanyn aıtty.
– Qazir teńizge shyǵar jolymyz bolmaǵanymen, keleshekte amalyn tabamyz. ıAǵnı qurlyq arqyly baılanys ornatýdyń mańyzy arta túsedi. Bizdiń óńirdiń áleýmettik-ekonomıkalyq damýy ornyqty. Saıası erik-jiger, strategııalyq ınvestıtsııa men halyqaralyq seriktestik bolsa, teńizge shyǵatyn joldyń joqtyǵy kedergi emes, kerisinshe, ósimge yntalandyrady. Ortalyq Azııa ózara tıimdi yqpaldastyq qanat jaıǵan aımaqqa aınalǵanyna kýá bolyp otyrmyz. Óńirdiń saýda, ınvestıtsııa, kólik, baılanys jáne resýrstardy ornyqty basqarý salalarynda damý áleýeti joǵary. Eki kún buryn Qazaqstan men Birikken Ulttar Uıymy arasynda Ortalyq Azııa men Aýǵanstanǵa arnalǵan ornyqty damý maqsattary jónindegi óńirlik ortalyǵyn qurý týraly kelisimge qol qoıyldy. Onyń shtab-páteri Almatyda ornalasqan. Bul tutas aımaq úshin mańyzdy jetistik ári Avaza baǵdarlamasynyń ıgi maqsattaryna tolyq saı keledi. Qazaqstannyń osy bastamasyn qoldaǵany úshin BUU Bas hatshysyna jáne Ortalyq Azııadaǵy seriktesterimizge taǵy da rızashylyǵymdy bildiremin, – dedi Prezıdent.
Qasym-Jomart Toqaev sózin qorytyndylaı kele, Qazaqstannyń teńizge shyǵar joly joq damýshy elder tobynyń maqsattary men qaǵıdattaryna beıil ekenin rastady.
– Teńiz qatynasy joq damýshy elderdiń jahandyq kún tártibinen tys qalmaýyn halyqaralyq seriktestikti nyǵaıtý arqyly ǵana qamtamasyz ete alamyz, – dedi Memleket basshysy.
Osyǵan deıin Prezıdenttiń Ortalyq Azııa memleketteri basshylarynyń beıresmı kezdesýine qatysqany týraly jazdyq.