Úndistan-Qytaı shekarasyndaǵy turaqtylyq jahandyq mańyzǵa ıe - Halyqaralyq sarapshy
ASTANA. KAZINFORM – 15 qazan kúni ІІ Astana Think Tank Forum-2025 halyqaralyq forýmynyń paneldik sessııasynda sóz sóılegen Úndistandaǵy Ǵalamdyq zertteýler ınstıtýtynyń prezıdenti Ashok Sadjanhar Úndistan men Qytaı shekarasyndaǵy turaqtylyq jahandyq ekonomıkaǵa áser etetin mańyzǵa ıe ekenin atap ótti.
Forýmnyń «Qıylystaǵy kóppolıarlyq: Bólingen álemdegi jahandyq basqarý júıesin reformalaý» atty paneldik sessııasy barysynda sarapshylar óńirge, jahandyq geosaıası ahýalǵa qatysty túıtkilderdi talqylady.
Máselen Úndistandaǵy Ǵalamdyq zertteýler ınstıtýtynyń prezıdenti Ashok Sadjanhar Qytaı men Úndistan arasyndaǵy keıbir shekaralyq túıtkilderge jáne ony retteý baǵytyndaǵy qolǵa alynyp jatqan sharalarǵa toqtaldy. Onyń aıtýynsha, halqy kóp eki alyp el arasyndaǵy shekara mártebesi áli tolyq aıqyndalmapty.
– Qytaı – álemdegi ekinshi iri ekonomıka sanalady. Úndistan búginde álemdegi tórtinshi iri ekonomıka deńgeıine jetti. Jaqyn ýaqytta ol da álemdegi ekinshi iri ekonomıkaǵa aınalýǵa shaq tur. Osy eki el arasyndaǵy shekara uzyndyǵy 3 500 shaqyrymdy quraıdy. Bul shekaranyń mártebesi tolyq aıqyndalmaǵan. Qazir Qytaı tarapymen osy másele boıynsha kelissózder júrip jatyr, – deıdi sarapshy.
Onyń aıtýynsha, Úndistan men Qytaı úshin, sondaı-aq búkil óńir men álem úshin eki el arasyndaǵy qatynastardyń qalypty, beıbit, boljamdy jáne turaqty bolýy asa mańyzdy.
– 2000 jyly keıbir aýmaqtar Úndistanǵa tıesili dep tanylyp, sol jaǵdaı shıeleniske sebep bolǵan edi. Alaıda búginde negizgi maqsat – sol kezdegi jaǵdaıdy qalpyna keltirip, qarym-qatynasty turaqtandyrý bolyp otyr. Qazir dál osy baǵytta naqty jumystar júrgizilip keledi, – deıdi Ashok Sadjanhar.
Ol eki el arasyndaǵy saýda qatynastary da qalypqa keltirilip jatqanyn jetkizdi.
Aıta ketsek, buǵan deıin Qytaı Memlekettik keńesi janyndaǵy Damý zertteý ortalyǵynyń Eýropa jáne Azııanyń áleýmettik damýy ınstıtýty Ǵylymı keńesiniń tóraǵasy Lı ıÝntsıýan ІІ Astana Think Tank Forum-2025 halyqaralyq forýmda sóz sóılep, «qyrǵı-qabaq soǵystan» keıingi álemdik qurylymnyń transformatsııasyn taldaǵanyn jazǵanbyz.