Halyqaralyq sarapshy Qazaqstannyń jańa Sý kodeksine joǵary baǵa berdi

ASTANA. KAZINFORM – Halyqaralyq sý resýrstaryn basqarý ınstıtýtynyń Ortalyq Azııa boıynsha aǵa ǵylymı qyzmetkeri Iskandar Abdýllaev Qazaqstanda qabyldanǵan jańa Sý kodeksine joǵary baǵa berdi. Bul týraly Sý resýrstary jáne ırrıgatsııa mınıstrligi málimdedi.

Sarapshynyń aıtýynsha, Qazaqstannyń sý zańnamasyn jańǵyrtýy – Ortalyq Azııanyń basqa elderi úshin oń baǵyttaǵy úlgi.

– Jańa Sý kodeksi – bul Qazaqstannyń tájirıbesi men úzdik halyqaralyq tájirıbeni biriktiretin keshendi qujat. Onda klımattyń ózgerýin jáne sý resýrstarynyń qalyptasý jaǵdaılarynyń ózgerýin eskeretin kóptegen jańa element bar. Osy turǵydan alǵanda, bul qujat sý zańnamasyn jańartý jolynda Ortalyq Azııa elderi úshin jaqsy úlgi bola alady. Sý sharýashylyǵy únemi damyp otyrady, onymen birge jańa syn-qaterler de týyndaıdy. Olardy eńserý úshin myqty ınstıtýtsıonaldyq negiz qajet, – dedi Iskandar Abdýllaev.

Jańa Sý kodeksi bıyl 10 maýsymnan bastap kúshine engenin eske sala keteıik.

Qujatty ázirleý kezinde Sý resýrstary jáne ırrıgatsııa mınıstrligi bes negizgi prıntsıpke súıendi. Olar: sýdy qorshaǵan ortanyń ajyramas bóligi, azamattardyń ómir súrý negizi jáne ekonomıkalyq damýdyń irgetasy retinde taný, sýdy qorǵaý jáne onyń sarqylýyn boldyrmaý, jerústi jáne jerasty sýyn keshendi paıdalaný, sý únemdeý tehnologııalaryn engizý jáne klımattyń ózgerýine beıimdelý, sý qoryn qorǵaý men paıdalanýǵa qoǵamdy tartý.