Halyqaralyq sarapshy Qazaqstannyń sý salasyn tsıfrlandyrýdaǵy jumysyn joǵary baǵalady

ASTANA. KAZINFORM — BUU Damý baǵdarlamasynyń sý resýrstaryn basqarý jónindegi halyqaralyq keńesshisi Hıýbert Lor Qazaqstannyń sý salasyn tsıfrlandyrý baǵytyndaǵy jumysyn joǵary baǵalady. Sarapshy, ásirese, elimizde sý resýrstaryn basqarýdy jańǵyrtý qarqynyn atap ótti. Bul týraly vedomstvonyń baspasóz qyzmeti málim etti.

— Munda kórip otyrǵan úderisterdi Germanııamen jáne jalpy Eýropamen tikeleı salystyratyn bolsaq, Eýropada mundaı jumystar eki ese kóp ýaqyt alady. Birinshiden, bul — zańnamalyq rásimderge baılanysty. Degenmen, ádette, barlyq qatysýshy arasyndaǵy úılestirý jáne kelisim protsesi áldeqaıda uzaqqa sozylady. Qazaqstannyń sý resýrstaryn basqarýǵa tsıfrlyq tehnologııalardy engizýge qanshalyqty yntaly ekeni meni tańǵaldyrdy ári erekshe áser qaldyrdy. Bul úshin qolaıly orta qalyptasqan. Sý resýrstary jáne ırrıgatsııa mınıstrligi, mınıstr, vıtse-mınıstrler men departamentter bir baǵytta jumys istep, ortaq maqsattardy kózdep otyr, — dedi BUU Damý baǵdarlamasynyń sý resýrstaryn basqarý jónindegi halyqaralyq keńesshisi.

Qazirgi tańda Qazaqstanda Sý resýrstarynyń ulttyq aqparattyq júıesi ázirlenip jatyr. Sonymen qatar sýarmaly sýdy jetkizý boıynsha elektrondy kelisimsharttar jasaý júıesi pılottyq rejımde synaqtan ótkizilip, ózen aǵysyn modeldeý jáne boljaý júıeleriniń qamtý aıasy keńeıtilip jatyr.

Aıta keteıik, sý únemdeý tehnologııasy engizilgen egis alqaby 1,3 mln gektarǵa deıin jetkizilmek.