Halyqaralyq operatsııalardan memleketke túsetin kirister artady – Qarjy mınıstri
Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine transferttik baǵa belgileý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy Kazinform.
Qujatty ázirleýdiń maqsaty - Qazaqstan Respýblıkasynyń transferttik baǵa belgileý salasyndaǵy zańnamasyn jetildirý jáne transferttik baǵa belgileýdi, sondaı-aq kapıtaldy elden shyǵarýdy baqylaý sharalaryn kúsheıtý.
«Memleket basshysynyń transferttik baǵa belgileý boıynsha baqylaýdy kúsheıtý jónindegi tapsyrmasyna sáıkes, zańǵa tıisti túzetýlerdiń jobasy ázirlendi. Zań jobasy Ekonomkalyq yntymaqtastyq jáne damý uıymynyń sarapshylarymen aldyn ala pysyqtalyp, qoldaý tapty. Bul rette, elimizdiń ekonomıkalyq erekshelikteri eskerildi», - dedi Premer-Mınıstrdiń orynbasary – Qarjy mınıstri Erulan Jamaýbaev.
Mınıstr tujyrymdamalyq ózgeristerge toqtala kele, naryqtyq baǵany anyqtaý ádisterin qoldanýdy jetildirý qarastyrylǵanyn aıtty.
«Qazirgi kezde zańda naryqtyq baǵany anyqtaý ádisiniń 5 ıerarhııasy qarastyrylǵan. Máselen, eger salyq tóleýshi besinshi ádisti qoldaný kerek dep sanasa, onda ol aldymen aldyńǵy tórt ádisti qoldaný múmkin emestigi týraly negizdemeler daıyndaýy kerek. Osyǵan oraı halyqaralyq mámilelerdiń sıpatyn eskerip, zań jobasynda naqty qaı ádisti qoldaný kerektigi anyqtalady. Bul sheshim salyq tóleýshiniń de, tekserýshilerdiń de ákimshilik shyǵyndaryn azaıtýǵa múmkindik beredi. Ekinshiden, naryqtyq dıapazondy aıqyndaý tetigin engizý eskerilgen. Qazir baǵa dıapazony men rentabeldilik naryqtyq baǵalardyń mınımaldy jáne maksımaldy mánderimen aıqyndalady. Ol naqty baǵalarǵa sáıkes kelmeýi de múmkin. Zań jobasynda neǵurlym ádil baǵalardy belgileý maqsatynda dıapazondy taryltý usynyldy. Bul qadam halyqaralyq praktıkaǵa sáıkes keledi», - dedi E. Jamaýbaev.
Úshinshiden, kapıtaldy shyǵarýǵa baqylaýdy kúsheıtý maqsatynda taraptardyń ózara baılanystylyǵyn aıqyndaýdy keńeıtý qarastyrylǵan. Sebebi keıbir iri salyq tóleýshiler jasandy deldaldyq qurylymdar qurady.
«Shıkizat ónimderin sondaı «eksklıýzıvti» treıderlerge tómendetilgen baǵamen satý faktileri bar. Bul rette ondaı treıderler boıynsha qarjylyq eseptilikti alý múmkin emes. ıAǵnı tekseriletin mámileler boıynsha jetkilikti aqparattyń bolmaýyna baılanysty elden kapıtaldy alyp ketý táýekeli týyndaıdy. Sondyqtan ózara baılanysty taraptar uǵymyn keńeıtý usynyldy», - dep túsindirdi Qarjy mınıstri.
Budan bólek, taýar bırjalarynda jasalǵan mámilelerge transferttik baǵa belgileý boıynsha baqylaý jasaý qarastyrylǵan. Qazirgi kezde transferttik baǵa belgileýge qatysty baqylaý elimizdiń taýar bırjalarynda jasalǵan mámileler boıynsha júzege asyrylmaıdy. Ádette, ondaı mámileler naryqtyq qunnan tómen baǵamen jasalady. Bul elden kapıtaldy syrtqa shyǵarýǵa múmkindik beredi. Osyǵan baılanysty, zańnan joǵaryda atalǵan normany alyp tastaý usynyldy.
«Atalǵan túzetýler álemdik jáne otandyq tájirıbeni eskere otyryp ázirlendi. Bul halyqaralyq operatsııalardan memleketke túsetin kiristerdi ulǵaıtýǵa múmkindik beredi», - dedi E. Jamaýbaev.
