Halyqaralyq olımpıadalarda júlde alǵan oqýshylar bıyl 77,5 mln teńge syıaqy aldy
ASTANA. KAZINFORM – 2024 jyly qazaqstandyq oqýshylar 35 halyqaralyq olımpıada men konkýrstarǵa qatysyp, 563 medal jeńip aldy: 77-si - altyn, 201-i – kúmis, 285-i – qola medal, ıaǵnı ár ekinshi qatysýshy júldeger atandy.
Oqý-aǵartý mınıstrligi Orta bilim komıtetiniń málimeti boıynsha, búginde orta bilim berý júıesinde 7 964 mektep bar, onda 3,9 mıllıonnan astam bala bilim alyp, 408 myń pedagog qyzmet etedi.
2024 jyly qol jetkizgen iri jetistikterdiń biri – halyqaralyq olımpıadalarǵa qatysqan qazaqstandyq oqýshylardyń árbir ekinshisi júldeli oryndarǵa ıe boldy. Qazaqstan quramasynyń qorjyny jalpy 563 medalmen tolyqty, onyń ishinde 77 altyn, 201 kúmis jáne 285 qola medal bar. (Ótken 2023 jyly oqýshylar 23 medal, onyń ishinde 2 altyn, 11 kúmis jáne 10 qola medal utyp alǵan bolatyn).
31 qazaqstandyq oqýshy álemniń eń bedeldi olımpıadalary – Halyqaralyq matematıka (IMO), fızıka (IPhO), bıologııa (IBO), lıngvıstıka (IOL), hımııa (IChO), geografııa (IGeO), jáne ınformatıka (IOI) pánderinen olımpıadalarǵa qatysyp, 26 medal jeńip aldy. Onyń ishinde 2 altyn, 12 kúmis jáne 12 qola medal bar.
Ásirese, hımııa páni boıynsha eń bedeldi Halyqaralyq olımpıadada (IChO) jáne robototehnıkadan «First Global Challenge» álem chempıonatynda qazaqstandyq oqýshylar 190 eldiń arasynan ozyp shyǵyp, eki olımpıadada da úsh márte álem chempıony atandy.
– Bul jetistikter – Memleket basshysynyń tapsyrmasy boıynsha daryndy oqýshylardy qoldaýǵa baǵyttalǵan sharalardyń nátıjesi. 2022 jyldan bastap halyqaralyq olımpıadalardyń jeńimpazdary men júldegerlerine, sonymen qatar olardy daıyndaǵan pedagogtarǵa birjolǵy aqshalaı syıaqy qarastyrylǵan. Bıyl 26 oqýshyǵa 77,5 mln teńge jáne 24 pedagogqa 6,4 mln teńge syıaqy beriledi. Salystyrar bolsaq, ótken jyly 23 oqýshy men 20 pedagog jalpy 71,4 mıllıon teńge syıaqy alǵan bolatyn. 2022 jyly 27 oqýshy men 26 pedagogqa barlyǵy 83,7 mıllıon teńge syıaqy berilgen, - dep jazylǵan Orta bilim komıtetiniń jaýabynda.
Sonymen qatar, halyqaralyq olımpıadalardyń jeńimpazdaryna kez kelgen qazaqstandyq JOO-ǵa túsýge bilim granty beriledi.
Eske sala ketsek, altyn medal jeńip alǵan oqýshy 1500 aılyq eseptik kórsetkish mólsherinde (5 mln 538 myń teńge), kúmis medal úshin – 1000 AEK (3 mln 692 myń teńge), qola medal úshin – 500 AEK (1 mln 846 myń teńge) mólsherinde aqshalaı syıaqy alady.
Jeńimpazdar men júldegerlerdi daıyndaǵan pedagogterge mynadaı mólsherde birjolǵy syıaqy beriledi:
- I dárejeli DIPLOM men altyn medal ıegerin daıyndaǵan pedagogke - bazalyq laýazymdyq jalaqynyń 26,5 eselengen mólsheri
- II dárejeli DIPLOM men kúmis medal ıegerin daıyndaǵan pedagogke-bazalyq laýazymdyq jalaqynyń 17, 5 eselengen mólsheri
- III dárejeli DIPLOM men qola medal ıegerin daıyndaǵan pedagogke-bazalyq laýazymdyq jalaqynyń 8,5 eselengen mólsheri.
Sonymen birge, bıyl Grekııadaǵy robototehnıka boıynsha FIRST GLOBAL CHALLENGE álemdik kezeńinde Almaty qalasynyń NZM oqýshylary absolıýtti jeńimpaz atandy. Bul jarysta Qazaqstan úshinshi jyl qatarynan absolıýtti chempıon bolyp keledi.
AQSh-ta robototehnıka boıynsha FIRST ROBOTICS álemdik chempıonatta RFMM oqýshylary joǵary marapatqa ıe boldy.
Taǵy bir jarqyn oqıǵa retinde - shilde aıynda Qazaqstanda IBO-2024 eń bedeldi bıologııa páni boıynsha Halyqaralyq olımpıadanyń ótkizilýin ataýǵa bolady. Oǵan 81 elden 305 jas bıolog pen 275 ǵalym qatysty. Qazaqstan quramasy 100% medaldik nátıje kórsetken.
Aýyl mektepteriniń oqýshylaryna arnalǵan respýblıkalyq pándik olımpıada elimizde ekinshi jyl ótkizilip keledi. Nátıjesinde aýyl oqýshylarynyń júldeli oryndarǵa ıe bolý kórsetkishi 10 esege artyp, myńdaǵan aýyl balalary úshin jańa múmkindikterge jol ashty.