Halyqaralyq olımpıadaǵa qatysqan árbir ekinshi oqýshy júldeger boldy — Oqý-aǵartý mınıstrligi

ASTANA. KAZINFORM — 2024-2025 oqý jylynda Qazaqstan oqýshylary halyqaralyq olımpıadalarda 362 medal jeńip aldy.

Bul týraly Ortalyq kommýnıkatsııalar qyzmetindegi brıfıngte Oqý-aǵartý mınıstrliginiń resmı ókili Mereke Nurmuhanova aıtty.

— 2024-2025 oqý jylynyń eń basty jetistikteriniń biri — halyqaralyq olımpıadalarǵa qatysqan árbir ekinshi qazaqstandyq oqýshynyń elge júldemen oralýy. Ulttyq qurama qorjynynda — 362 medal, onyń ishinde 41 altyn bar. Bul — Qazaqstan bilim sapasynyń halyqaralyq deńgeıde joǵary baǵalanýynyń aıqyn dáleli. Atalǵan oqý jylynda 40 paıyzdan astam oqýshy respýblıkalyq jáne halyqaralyq deńgeıdegi zııatkerlik sharalarǵa qatysty, — dedi ol.

Resmı ókildiń dereginshe, onyń ishinde Qazaqstan oqýshylary Azııa jáne álemdik olımpıadalarda bilimderimen erekshe daralanyp, bedeldi marapattarǵa ıe boldy. Olar lıngvıstıkadan — «Eń úzdik qatysýshy», fızıkadan — «Eń úzdik qatysýshy qyz bala», hımııadan — «Eń úzdik praktık», ınformatıkadan — «Eń úzdik ınformatık» atandy. Hımııa páninen eń bedeldi halyqaralyq olımpıadada — eki dúrkin, First Global Challenge robototehnıka chempıonatynda úsh dúrkin álem chempıony boldy.

— Bul mınıstrlik tarapynan bilim sapasyn arttyrý baǵytynda júrgizilip jatqan jumystardyń naqty nátıjeliligi men tıimdiligin kórsetedi. Budan bólek, Qazaqstan — olımpıada júldegerlerin qarjylaı yntalandyrý júıesin engizgen birden bir el. 2024 jyly halyqaralyq bedeldi olımpıadalarda top jarǵan 26 oqýshyǵa jáne olardy daıyndaǵan pedagogterge aqshalaı syıaqy berildi, — dedi Mereke Nurmuhanova.

Osyǵan deıin qazaqstandyq jas hımıkter Mendeleev olımpıadasynda 11 medal jeńip alǵanyn jazdyq.