Halyqaralyq olımpıadadan bas júlde alǵan oqýshy 6 mln teńge alady

ASTANA. Kazinform – Aýyl mektebiniń oqýshylaryn zııatkerlik olımpıadalar men baıqaýlarǵa daıyndaý maqsatynda «Daryn» onlaın mektebi óz jumysyn bastady. Bul týraly «Daryn» respýblıkalyq ǵylymı-praktıkalyq ortalyǵynyń dırektory Gajdembek Tursynov aıtty.

— Qazirgi ýaqytta Qazaqstan olımpıadalardyń júldegerlerin marapattaý tájirıbesine ıe az ǵana elderdiń biri. Prezıdenttiń bastamasymen 2022 jyldan bastap halyqaralyq pán olımpıadalarynyń jeńimpazdary men olardyń ustazdaryna aqshalaı syıaqy berile bastady. Halyqaralyq olımpıadalarda júldeli oryn alǵan oqýshylar bir rettik memlekettik syıaqy alady: altyn medal úshin — 1500 AEK, kúmis medal úshin — 1000 AEK, qola medal úshin — 500 AEK mólsherinde, — dedi ol. 

2025 jyly elimizde 1 AEK 3932 teńge bolyp bekitilgen. Soǵan saı, «altyn medal» alǵan oqýshy naqty 5 898 000 teńge alady. 

Spıker, sondaı-aq, mundaı oqýshylardy daıyndaǵan pedagogterdiń de qansha syıaqy alatynyn atap ótti.

— Altyn medal alǵan oqýshyny daıyndaǵan ustazǵa — laýazymdyq jalaqysynyń 26,5 eselengen mólsherinde, kúmis medal alǵanǵa — 17,5 eselengen mólsherinde, qola medal alǵanǵa — 8,5 eselengen mólsherinde biliktilik arttyrý deńgeıine sáıkes syıaqy beriledi, — dedi Gajdembek Tursynov.

Aıta keteıik, elimizde shalǵaı aýyldarda turatyn daryndy oqýshylardy olımpıadaǵa daıyndaıtyn onlaın mektep ashyldy.