Halyqaralyq Olımpıada kúni týǵan sábıler sertıfıkattar men syılyqtar aldy
ASTANA. KAZINFORM – Qazaqstan Ulttyq Olımpıadalyq komıteti Halyqaralyq Olımpıada kúnine oraı, elimizde 23 maýsym kúni dúnıe esigin ashqan barlyq nárestelerge arnaıy sertıfıkat, quttyqtaý haty jáne estelik syılyqtar tabystady.
QR Ulttyq olımpıadalyq komıtetiniń baspasóz qyzmeti atap ótkendeı, «Olımpıada kúni týǵan» dástúrli aktsııasy keshe saǵat 00:00-de bastalyp, elimizdiń 17 oblysy men Astana, Almaty jáne Shymkent qalalaryn qamtydy. Aktsııaǵa Qazaqstannyń barlyq óńirindegi 240 perzenthana qatysty. Keshe ómirge kelgen sábılerdiń bárine syılyqtar jıyntyǵy tabystaldy.
23 maýsymda týǵan sábılerge arnalǵan merekelik jıyntyq «Olympian is born» («Ómirge olımpıadashy keldi») jazbasy bar bodılar tabystalyp, olımpıadashylar atynan quttyqtaýtar joldandy.
«Ulttyq Olımpıadalyq komıtet úshin bul kúnniń orny erekshe. Biz úlken olımpıadalyq otbasymyzǵa qosylǵan barlyq sábıdi osylaı qarsy alamyz. Ómirlik tańdaýynyń qandaı bolaryna qaramastan, biz osy bir erekshe data – Halyqaralyq Olımpıada kúninde týǵan árbir balanyń qandaı synaqtan bolsa da súrinbeı ótetinine senemiz. Olardyń armandarynyń oryndalýyn tileımiz. Bala armanynyń qanshama bıiktigine qaramastan ony oryndaýǵa bolatynyn bizdiń sportshylarymyz sán márte dáleldep shyqqan. Qazirgi chempıondardyń jańa týǵan sábılerge joldaǵan tilegi ómirin endi bastaǵan bóbekter men bizdiń olımpıadashylar arasyndaǵy buzylmas baılanys ispetti. Biz osy kúni ómirge kelgen náresteler men men olardyń otbasylarynyń qýanyshyna ortaqtasyp, zor densaýlyq, baqyt, baılyq tileımiz», - dep atap ótti Qazaqstan UOK.
Astana perzenthanalaryndaǵy jańa týǵan sábılerge syılyqtardy bokstan álem chempıony Mereı Aqshalov pen short-trekten álem birinshiliginiń kúmis júldegeri Denıs Nıkısha jetkizdi.
Aktsııa 23 maýsym kúni saǵat 00:00-de aıaqtalady. Byltyr Halyqaralyq Olımpıada kúninde 2000-ǵa jýyq bala dúnıege keldi. 2024 jyly týǵan sábıler sany 24 maýsymda, ıaǵnı búgin anyqtalady.
Aıta ketelik, Halyqaralyq Olımpıada kúnine arnalǵan biregeı aktsııany Qazaqstan UOK alǵash ret 2020 jyly júzege asyrdy.
Aktsııa QR Densaýlyq saqtaý mınıstrligi men molekýlıarly medıtsına Ortalyǵynyń qoldaýymen ótti.
Aıta keteıik, Parıjdegi Olımpıada oıyndary osy jyldyń 26 shildesi men 11 tamyzy aralyǵynda ótedi.
