Halyqaralyq Olımpıada kúni: Astanada júzýden jarystar ótti
ASTANA. KAZINFORM – Halyqaralyq Olımpıada kúnin merekeleý aıasynda Astanada Qazaqstan Ulttyq Olımpıadalyq komıteti ıÝNISEF qoldaýymen uıymdastyrǵan balalar arasyndaǵy júzý jáne ártistik júzý jarystary ótti.
«Ózen» sport kesheniniń basseıninde ótken sporttyq merekeniń baǵdarlamasy ártúrli jastaǵy jáne daıyndyq deńgeıindegi qatysýshylardy biriktirdi. «Start» tobynda taqtaıshamen 25 metrge erkin stılde júzý jáne 4h25 metrlik komandalyq estafeta uıymdastyryldy. Al «Damý» tobyndaǵy sportshylar dál osy qashyqtyqtarda, biraq qosymsha júzý quraldarynsyz synǵa tústi.
Kúnniń eń jarqyn oqıǵalarynyń biri Olympic Art Swim Fest festıvali boldy. Sportshylar Olımpıada oıyndarynyń qatysýshylary Aleksandra men Ekaterına Nemıchtiń jetekshiligimen daıyndalǵan ártistik júzýden áserli kórsetilim baǵdarlamasyn usyndy.
Jarys kúniniń qorytyndy kezeńinde «Sheberlik» tobynyń qatysýshylary baq synady. Bul sanatta jas júzýshiler 50 metrge erkin stılde júzýden jeke synda úzdikterdi anyqtap, keıin 4h50 metrlik estafetaǵa qatysý úshin komandalarǵa birikti.
- Olımpıadalyq qozǵalys – bul tek iri halyqaralyq jarystar ǵana emes, sonymen qatar árbir qatysýshy óz múmkindigin kórsete alatyn, jańa áser alyp, aldaǵy damýyna shabyt tabatyn osyndaı sporttyq merekeler. Halyqaralyq Olımpıada kúni adamdardy dostyq, qurmet jáne kemeldikke umtylý qundylyqtarynyń tóńiregine toptastyrady. Biz úshin ártúrli jastaǵy sport súıer qaýym ózin úlken álemdik sport merekesiniń bir bóligi retinde sezine alatyn orta qalyptastyrý mańyzdy, – dedi Qazaqstan Ulttyq Olımpıadalyq komıtetiniń bas dırektory Nurlan Nógerbek.
Jas sportshylar Olympic Day aıasyndaǵy túrli belsendilikterge qatysyp, arnaıy sertıfıkattarǵa ıe boldy.
Aıta keteıik, Halyqaralyq Olımpıada kúni jyl saıyn 23 maýsymda Halyqaralyq Olımpıada komıtetiniń 1894 jyly qurylǵanyna oraı atap ótiledi. Buǵan deıin elordada Barys Fest balalar hokkeı týrnıri ótip, ol da aýqymdy merekelik baǵdarlamanyń bir bóligine aınalǵan bolatyn.
Eske salsaq, Qytaıda ótken Azııa chempıonatynda Qazaqstan quramasy 2 altyn medal ıelendi.
