Halyqaralyq matematıka olımpıadasynyń júldegeri Massachýsets tehnologııalyq ınstıtýtyn tústi
ASTANA. KAZINFORM — Ámirlan Amanjolov ózine tolyq bilim berý granty usynylǵan Massachýsets tehnologııalyq ınstıtýtyn (MIT) tańdady. Bul týraly Oqý-aǵartý mınıstrliginiń baspasóz qyzmeti habarlady.
Haileybury Almaty mektebiniń 12-synyp oqýshysy Ámirlan Amanjolov -ulttyq quramanyń múshesi jáne Qazaqstannyń bolashaǵynan zor úmit kúttiretin jas matematıkteriniń biri.
Sońǵy jyldary ol álemdik arenalarda turaqty túrde joǵary nátıjeler kórsetip keledi. Ámirlan olımpıadalyq matematıkamen 7-synyptan bastap aınalysady. Onyń halyqaralyq jarystardaǵy jetistikteri -júıeli daıyndyqtyń, ustazdary men otbasynyń qoldaýymen atqarylǵan kópjyldyq eńbektiń jemisi.
2025 jyly Ámirlan Avstralııada ótken 66-shy Halyqaralyq matematıka olımpıadasyna (IMO) qatysty. Jarys qorytyndysy boıynsha Qazaqstan quramasy 112 eldiń ishinde 17-orynǵa ıe bolsa, Ámirlannyń ózi kúmis medal jeńip aldy.
Oqýshynyń jetistikteri memlekettik deńgeıde joǵary baǵalandy. 2025 jyly ol Memleket basshysy Qasym-Jomart Toqaevtyń qabyldaýynda bolyp, 1000 AEK kólemindegi birjolǵy syıaqy sertıfıkatyn ıelendi. Sonymen qatar, oqýshynyń jattyqtyrýshysy da memlekettik nagradamen marapattaldy.
Tolaǵaı tabystarynyń arqasynda Ámirlan Garvard, Stenford, Kalıfornııa jáne Massachýsets tehnologııalyq ınstıtýttary (MIT), sondaı-aq Londonnyń Imperııalyq kolledji sııaqty álemniń jetekshi joǵary oqý oryndarynan shaqyrtý aldy. Nátıjesinde ol ózine tolyq bilim berý granty usynylǵan Massachýsets tehnologııalyq ınstıtýtyn (MIT) tańdady.
Ámirlannyń aıtýynsha, olımpıadalyq qozǵalys onyń akademııalyq damýynyń negizgi faktory bolyp, armandaǵan ýnıversıtetine túsýge septigin tıgizgen.
Aıta ketelik Qazaqstan birqatar damyǵan elden ozyp, álemdik bilim berý reıtınginde top-20-ǵa engen edi.
