Halyqaralyq kólik dálizderi men ótkizý pýnktterindegi protsesterdi tsıfrlandyrý kerek – Bektenov
ASTANA. KAZINFORM – Bıyl 10 aıda Qazaqstan arqyly tranzıttik tasymal kólemi 29 mıllıon tonnadan asyp, naqty ósim kórsetti. Bul týraly Úkimet otyrysynda Premer-mınıstr Oljas Bektenov aıtty.
– Memleket basshysy Qazaqstandy Eýrazııa keńistigindegi basty kólik torabyna aınaldyrý boıynsha strategııalyq mindet qoıdy. Ony iske asyrý úshin júıeli sharalar qabyldanyp jatyr. Transkaspıı halyqaralyq kólik baǵytynyń ótkizý qabileti ulǵaıtyldy, sheteldik seriktestermen tarıftik saıasat úılesimdi túrde júrgizilip, júkterdi jetkizý merzimderi qysqartyldy. Avtojol ınfraqurylymyn tranzıttik jáne halyqaralyq dálizderge basymdyq bere otyryp jańǵyrtý jumystary qolǵa alyndy. Konteınerlik tasymal kólemi ósti, - dedi Úkimet basshysy.
Onyń aıtýynsha, Qazaqstan-Qytaı shekarasynda pılotsyz tasymal men biryńǵaı elektrondyq deklaratsııany qamtıtyn «Aqyldy keden» jobasy júzege asyrylyp jatyr.
– Qabyldanǵan sharalardyń nátıjesinde bıyl 10 aıda Qazaqstan arqyly tranzıttik tasymal kólemi 29 mıllıon tonnadan asyp, naqty ósim kórsetti. Sonymen qatar tranzıttik júk tasymaly úshin báseke kúsheıip barady. Osy oraıda kólik logıstıkalyq júıeniń qolda bar áleýetin belsendi túrde keńeıtý qajet. Birinshi kezekte halyqaralyq kólik dálizderi men ótkizý pýnktterindegi protsesterdi jyldam tsıfrlandyrý kerek, - dedi ol.
Premer-mınıstrdiń atap ótýinshe, júk jóneltýshiler úshin kólik logıstıkalyq operatsııalardyń jedeldigi, aldyn ala boljaý múmkindigi jáne tsıfrlyq ashyqtyǵy tasymal baǵytyn tańdaýda negizgi faktor sanalady.
– Osyǵan baılanysty Prezıdent Joldaýy aıasynda logıstıkada, onyń ishinde Smart Cargo ekojúıesi de bar, tolyqtaı tsıfrlyq sheshimder júzege asyrylýda. Ol júk qozǵalysyna onlaın-monıtorıng júrgizý jáne búkil baǵyt boıynsha memlekettik jáne jeke tsıfrlyq platformalardy ıntegratsııalaý maqsatyn kózdeıdi. Alaıda búginde servısterdiń barlyǵy birdeı qosylyp, jumys istep turǵan joq. Sondyqtan Kólik mınıstrligi múddeli memlekettik organdarmen birlesip, 2026 jyldyń 1 sáýirine deıin servıster men aqparattyq resýrstardyń tolyq ıntegratsııasyn aıaqtaýy qajet, - dedi Oljas Bektenov.
Aıta keteıik, Úkimet otyrysynda elimizdiń kólik-tranzıt salasyn damytý men tsıfrlandyrý máselesi talqylandy.