Halyqaralyq koalıtsııa Irakqa barlyq bazasy men shtabtaryn tapsyrdy
ASTANA.KAZINFORM – Halyqaralyq koalıtsııa mıssııasy aıaqtalǵannan keıin Baǵdad el qaýipsizdigin óz kúshimen qamtamasyz etýge daıyndalyp jatyr, dep habarlaıdy Kazinform agenttiginiń menshikti tilshisi.
AQSh bastaǵan halyqaralyq koalıtsııa Irak bıligine ózine tıesili barlyq baza men shtabtardy tapsyrdy. Al 30 qyrkúıekten keıin el aýmaǵynda koalıtsııanyń áskerı jáne oqý-jattyǵý bólimsheleri qalmaıdy. Bul týraly Iraktyń Qaýipsizdik máseleleri jónindegi aqparat basqarmasynyń basshysy Saad Maan Al Jazeera telearnasyna bergen suhbatynda málimdedi.
— Qazir Irakta halyqaralyq koalıtsııanyń áskerı kúshteri joq. 30 qyrkúıekten keıin onyń oqý-jattyǵý bólimsheleri de bolmaıdy. Koalıtsııa shyǵarylǵannan keıin Irak qaýipsizdik úshin jaýapkershilikti óz moınyna alýǵa daıyn, — dedi Maan.
Onyń aıtýynsha, mıssııa aıaqtalǵan soń Irak koalıtsııa quramyndaǵy memlekettermen ekijaqty yntymaqtastyq ornatady.
AQSh 2014 jyly Irak bıliginiń kómek suraǵan úndeýinen keıin «Islam memleketine» qarsy kúres jónindegi halyqaralyq koalıtsııa qurdy (Qazaqstan Respýblıkasynda tyıym salynǵan uıym – red. eskertpesi). Koalıtsııa quramyna Ulybrıtanııa, Frantsııa, Germanııa, Italııa, Ispanııa jáne Iordanııa sııaqty memleketter qosyldy.
#ThrowbackThursday Soldiers with Qwat al-Khasah, the Special Forces of Iraq, conducting tactical training alongside coalition partners, Aug. 2020. CJTF-OIR and the ISF continue to cooperate towards maintaining a stable & secure region. #OneMissionManyNations #PartnerofChoice https://t.co/vJqNcrVEUT
— Operation Inherent Resolve (@CJTFOIR) July 25, 2024
Koalıtsııanyń Iraktaǵy áskerı mıssııasy «Myzǵymas sheshim» operatsııasy aıasynda júrgizildi. Onyń qatysýshylary Irak kúshterine qarýly toppen kúreste qoldaý kórsetip, keıin áskerı qyzmetshilerdi daıarlap, keńes berdi. 2024 jylǵy qyrkúıekte Baǵdad pen Vashıngton bul mıssııany 2026 jylǵy 30 qyrkúıekke deıin aıaqtaý týraly ýaǵdalasty.
2026 jylǵy qańtarda koalıtsııa keńesshileri Iraktyń federaldyq bóligindegi bazalar men komandalyq pýnktterden, sonyń ishinde Aın-ál-Asad áýe bazasynan shyqty. Alaıda Iraktyń jartylaı avtonomdy Kúrdistan aımaǵynyń astanasy Erbıldegi koalıtsııa bólimsheleri Sırııadaǵy «Islam memleketi» tobyna qarsy operatsııalarǵa qoldaý kórsetýdi jalǵastyrdy.
Baǵdad pen Vashıngton kelisken josparǵa sáıkes, mıssııanyń bul kezeńi qyrkúıek aıynyń sońyna deıin aıaqtalýǵa tıis.
Mıssııanyń aıaqtalýy Iraktyń Kúrdistan aımaǵyndaǵy koalıtsııa qyzmetine de áser etti. Koalıtsııa tórt jyldyq kelisim merzimi aıaqtalǵannan keıin kúrd qarýly kúshterine qarjylaı kómek kórsetýdi toqtatty.
Kúrdistannyń qarýly kúshteri mınıstrliginiń bas hatshysy Bahtııar Muhammed Sıddık tamyz jáne qyrkúıek aılaryna berilgen qarjynyń sońǵy tólem bolǵanyn aıtty. Ol Baǵdadtaǵy federaldyq úkimetti koalıtsııa toqtatqan qarjylaı kómektiń ornyn toltyrýǵa shaqyrdy.
Buǵan deıin AQSh-tyń 30 qyrkúıekke deıin áskerin Iraktan tolyq shyǵaratynyn habarlaǵan bolatynbyz.
Bul týraly Irak premer-mınıstri Álı áz-Zaıdı de bıyl mamyr aıynda Vashıngtonǵa sapary barysynda AQSh prezıdenti Donald Tramppen kezdesýde málimdegen edi.
