Halyqaralyq qylmystyq sot tarıhynda alǵash ret bas prokýror qyzmetinen shettetildi
ASTANA. KAZINFORM – Halyqaralyq qylmystyq sotqa múshe memleketter kópshilik daýyspen bas prokýror Karım Handy qyzmetinen shettetý týraly sheshim qabyldady. Bul – sot tarıhyndaǵy alǵashqy osyndaı jaǵdaı, dep habarlaıdy Euronews.
Karım Hanǵa taǵylǵan seksýaldyq qysym kórsetý aıyptarynan keıin ol qyzmetinen shettetildi. Bas prokýror bul aıyptardy birneshe ret joqqa shyǵarǵan.
Karım Handy qyzmetinen shettetý máselesi boıynsha jasyryn daýys berý BUU-nyń Nıý-Iorktegi shtab-páterinde ótken arnaıy sessııada uıymdastyryldy. Halyqaralyq qylmystyq sotqa múshe 125 memlekettiń 82-si ony qyzmetinen shettetýdi qoldap daýys berdi.
Maýsym aıynda ishki tergeý onyń qyzmettik ádep qaǵıdalaryn óreskel buzǵany jóninde qorytyndy jasaǵannan keıin Karım Han aıyptar qaralǵan kezeńde ýaqytsha qyzmetinen shettetilgen edi. Onyń ózi bul qorytyndylardy úzildi-kesildi joqqa shyǵarady.
Karım Hannyń qyzmetinen shettetilýi AQSh prezıdenti Donald Tramp ákimshiliginiń Halyqaralyq qylmystyq sotqa qysymdy kúsheıtken kezeńimen tuspa-tus keldi. Buǵan deıin AQSh ákimshiligi Karım Hanǵa jáne HQS-tyń taǵy on eki qyzmetkerine qarsy sanktsııa engizgen.
Sanktsııalar sottyń Izraıldiń joǵary laýazymdy sheneýnikterine, sonyń ishinde premer-mınıstri Bınıamın Netanıahýǵa Gaza sektoryndaǵy soǵysqa baılanysty qamaýǵa alý orderin bergenine, sondaı-aq Aýǵanstandaǵy oqıǵalarǵa qatysty amerıkalyq áskerı qyzmetshilerge baılanysty HQS júrgizip jatqan tergeýlerge jaýap retinde engizildi.
AQSh memlekettik hatshysy Marko Rýbıo ótken aptada Amerıka Qurama Shtattary «Halyqaralyq qylmystyq sottyń AQSh egemendigine tóndirip otyrǵan qaterin joıýǵa baǵyttalǵan aýqymdy naýqandy» bastaıtynyn málimdedi.
Rýbıonyń aıtýynsha, Vashıngton memleketterdiń HQS quramynan shyǵýyna yqpal etýge, sotpen yntymaqtasatyn uıymdarǵa qarsy sanktsııalar engizýge, sondaı-aq sot qyzmetkerleriniń AQSh-qa kirýine tyıym salýǵa nıetti.
Karım Hannyń qyzmetinen shettetilýi buǵan deıin shyǵarylǵan qamaýǵa alý orderlerine birden áser etpeıdi. Olardyń kúshinde qalýy nemese joıylýy týraly sheshimdi tek Halyqaralyq qylmystyq sottyń sýdıalary ǵana qabyldaıdy.
Aıta keteıik, Ulybrıtanııa sottalǵandardy merziminen buryn bosatý baǵdarlamasyn ýaqytsha toqtatty.
Al Ońtústik Koreıa soty burynǵy birinshi hanym isiniń úkimin keıinge qaldyrdy.
