Halyqaralyq kıberalaıaqtyq arnasy joıyldy

ASTANA. KAZINFORM – Qazaqstan, Qyrǵyzstan jáne Reseı Іshki ister mınıstrlikteriniń kıberpolıtsııasy birlesip ótkizgen operatsııa nátıjesinde TMD elderiniń azamattaryna qatysty ınternet-alaıaqtyq jasaǵan transulttyq qylmystyq toptyń qyzmeti toqtatyldy. Bul týraly ІІM baspasóz qyzmeti habarlady. 

8 qyrkúıekte kúdikti Bishkek qalasynda ustaldy. Ol jalǵa alǵan páterdi tintý kezinde 32 slotty sım-boks, úshinshi tulǵalarǵa rásimdelgen 70-ten astam SIM-karta, IP-di almastyrýǵa arnalǵan jabdyqtar, kompıýterler men telefondar tárkilendi. Aldyn ala málimet boıynsha, kúdikti qylmystyq áreketi úshin aptasyna 500 AQSh dollary kóleminde qarajat alyp otyrǵan.

Mundaı qurylǵylar qylmyskerlerge bankter, memlekettik organdar jáne marketpleıster atynan jappaı frod-qońyraýlar men habarlamalar jiberýge múmkindik beredi. Olardyń kózdegeni – azamattardyń aqshasyn jáne jeke derekterin urlaý. Jalpy jyl basynan beri Kıberqylmysqa qarsy is-qımyl departamenti 77 sım-boksty jáne alaıaqtar paıdalanǵan 90 myńǵa jýyq SIM-kartany tárkiledi.

Eske sala keteıik, 16 qyrkúıekten bastap droptardyń is-áreketi úshin jaýapkershilik, onlaın-nesıe berýdi shekteý jáne SIM-kartalardyń aınalymyn retteý sııaqty jańa zań normalary kúshine enedi. 

Aıta ketelik Almatyda psıhotroptyq zattardy jetkizý arnasy áshkerelengen edi.