Halyqaralyq keme qatynasyna jasalǵan shabýyldardan keminde 22 teńizshi qaza tapty — HKU
ASTANA. KAZINFORM — Halyqaralyq teńiz uıymynyń (HKU) Bas hatshysy Arsenıo Domınges memleketterdi saýda kemeleri men teńizshilerdiń ómirine qaýip tóndiretin áreketterden aýlaq bolýǵa shaqyrdy, dep habarlaıdy BUU jańalyqtar qyzmeti.
HKU-nyń Júk jáne konteınerlerdi tasymaldaý jónindegi kishi komıtetiniń otyrysynda sóz sóılegen ol geosaıası shıelenistiń keme qatynasy salasyna tıgizip otyrǵan aýyr zardaptaryna nazar aýdardy.
— Qaqtyǵystar saýda kemeleri men esh jazyǵy joq teńizshilerge shabýyl jasaýǵa syltaý retinde paıdalanylyp otyr, — dedi Arsenıo Domınges.
Taıaý Shyǵystaǵy qazirgi qaqtyǵys bastalǵaly beri HKU Ormýz buǵazy men oǵan irgeles aýmaqta halyqaralyq keme qatynasyna jasalǵan 80 shabýyldy rastaǵan. Sonyń saldarynan keminde 22 teńizshi qaza taýyp, taǵy kóptegen adam jaraqat alǵan.
Qara jáne Azov teńizderinde de sońǵy aılarda halyqaralyq keme qatynasyna jasalǵan shabýyldar saldarynan ondaǵan adam qaza tapqany týraly aqparat bar. Alaıda HKU naqty qaza bolǵandar sanyn rastaý qıyn ekenin atap ótti.
Qyzyl teńizde de shabýyldar qaıta jalǵasty. 11 tamyzda bolǵan sońǵy oqıǵa kezinde hýsıtter saýda kemesine shabýyl jasap, saldarynan tórt adam qaza tapqan.
Domınges bul qaqtyǵystar aıasyndaǵy shabýyldarǵa bir ǵana tarap jaýapty emes ekenin atap ótti.
— Ormýz buǵazynda saýda kemelerine shabýyldy bir ǵana el jasamaıdy. Qara jáne Azov teńizderinde de saýda kemelerine shabýyldy bir ǵana el jasamaıdy, — dedi HKU basshysy.
Onyń aıtýynsha, geosaıası qaqtyǵystardyń túpki sebepterin joıý HKU mandatyna kirmeıdi. Alaıda olardyń álemdik teńiz saýdasy men keme qatynasyna áseri barǵan saıyn aıqyn baıqalyp otyr.
Domınges delegattardy osy zardaptar týraly óz úkimetterine habarlaýǵa jáne máseleni tıisti halyqaralyq alańdarda kóterýge shaqyrdy. Onyń sózinshe, keme qatynasy buzylǵan kezde onyń saldary teńiz salasymen ǵana shektelmeı, ekonomıkaǵa, jetkizý tizbekterine jáne adamdardyń kúndelikti ómirine áser etedi.
— Sizderdi osy zardaptar týraly aqparatty óz elderińizdegi tıisti organdarmen bólisýge shaqyramyn. Bul másele Birikken Ulttar Uıymy aıasynda tıisti deńgeıde qaralýy qajet. Túpki sebepterdi joıý jáne sheshimder izdeý — sizderdiń astanalaryńyzdaǵy jáne BUU-nyń tıisti organdaryndaǵy mindet, — dep atap ótti ol.
HKU hatshylyǵy keme qatynasy salasyna tehnıkalyq jáne operatsııalyq deńgeıde naqty sheshimder ázirleýge járdemdesýge daıyn ekenin málimdedi.
Júk jáne konteınerlerdi tasymaldaý jónindegi kishi komıtetiniń otyrysy 14–18 qyrkúıek aralyǵynda Londonda ótip jatyr. Jıynda qaýipti júkterdi, úıindi júkterdi jáne konteınerlerdi teńiz arqyly tasymaldaý kezindegi qaýipsizdik máseleleri talqylanýda.
Buǵan deıin hýsıtterdiń munaı men júk tasymaly úshin mańyzdy baǵyttaǵy araldy basyp alǵany habarlanǵan bolatyn.
