Halyqaralyq «Qazaq tili» qoǵamy OpenAI-men ChatGPT-diń qazaqsha qyzmet sapasyn birlesip arttyrýǵa kelisti
ASTANA. KAZINFORM – Memleket basshysy Qasym-Jomart Toqaevtyń AQSh-qa sapary aıasynda Halyqaralyq «Qazaq tili» qoǵamy men OpenAI, Inc. kompanııasy ChatGPT-diń qazaq tilindegi qyzmet sapasyn birlesip arttyrýǵa kelisti.
OpenAI kompanııasynyń bilim berý jáne memlekettik baǵdarlamalar jónindegi jetekshisi Kevın Mılls pen Halyqaralyq «Qazaq tili» qoǵamynyń prezıdenti Raýan Kenjehanuly qazaq tilinde jasandy ıntellektiniń dál jáne sapaly jumys isteý áleýetin arttyrýǵa baǵyttalǵan birlesken bastamalardy júzege asyrý jaıyn talqylady.
Raýan Kenjehanulynyń aıtýynsha, bul kelisimdi iske asyrýdaǵy negizgi mindet – qazaq tilindegi derekter qoryn kóbeıtip, tildik modelderdiń dáldigin jetildirý jáne júıeni ulttyq mádenıet, ádebıet pen tarıhqa qatysty mazmunmen baıytý.
- «Qazaq tili» qoǵamynyń negizgi jumys baǵyttary qazaqsha mazmundy damytý ekenin bilesizder. Osy kelisim aıasynda Halyqaralyq «Qazaq tili» qoǵamy ChatGPT-diń qazaq tilindegi qyzmetiniń mazmundyq sapasyn arttyrý úshin birqatar mindettemeler alady. Biz óz tarapymyzdan barynsha sapaly tsıfrlyq kontent usynamyz. Bul seriktestik – qazaq tilin zamanaýı tehnologııalar keńistiginde damytýǵa jáne jahandyq tsıfrlyq ekojúıede onyń ornyn aıqyndaıtyn mańyzdy qadam bolady dep senemiz, - deıdi ol.
Kelisim nátıjesinde muǵalimderge qazaq tilindegi oqý baǵdarlamalary men sabaq josparlary, dárister jáne ádistemelik materıaldardy jasandy ıntellekt quraldarynyń kómegimen ázirleýge jańa múmkindikter ashylady.
Buǵan deıin Otandyq JOO-lar ChatGPT Edu bilim berý platformasyna qosylatynyn jazǵan edik.