Halyqaralyq qaýymdastyq Izraıldi Gaza sektoryn basyp alýdy dereý toqtatýǵa shaqyrdy
ASTANA. KAZINFORM — Izraıldiń Gazany basyp alý jospary BUU men halyqaralyq qaýymdastyqtyń synyna ushyrady, dep habarlaıdy Kazinform menshikti tilshisi.
BUU Adam quqyqtary jónindegi basqarmasynyń basshysy Folker Tıýrk juma kúni «Izraıl úkimetiniń okkýpatsııalanǵan Gaza sektoryn tolyq áskerı basyp alý jospary dereý toqtatylýy kerek» dep málimdedi.
Eske sala ketsek, Izraıldiń qaýipsizdik kabıneti jumaǵa qaraǵan túni premer-mınıstr Bınıamın Netanıahýdyń Gaza qalasyn baqylaýǵa alý týraly sheshimin bekitti. Josparǵa sáıkes, Izraıl áskeri Gaza qalasyn basyp alýǵa daıyndalady.
Tıýrk atap ótkendeı, bul jospar Izraıldiń eki memleket týraly kelisilgen sheshimniń júzege asýy jáne palestınalyqtardyń óz taǵdyryn tańdaý quqyǵymen sáıkes keletin okkýpatsııasyn múmkindiginshe tezirek toqtatýy kerek degen BUU Halyqaralyq sotynyń sheshimine qaıshy kelip otyr.
Ol sondaı-aq Izraıl «gýmanıtarlyq kómektiń tolyq jáne kedergisiz aǵynyn» qamtamasyz etýi kerektigin, al Palestına qarýly toptary kepilge alynǵandardy shartsyz bosatýy kerektigin basa aıtty. Buǵan qosa, Tıýrk Izraıldi «erikti negizde ustalǵan palestınalyqtardy» bosatýǵa shaqyrdy.
Izraıl úkimetiniń sheshimi el ishinde jáne shetelde ótkir synǵa ushyrady.
Izraıl oppozıtsııasynyń jetekshisi ıAır Lapıd usynylǵan jospardy «apat» dep atap, bul kepilge alynǵandar men Izraıl áskerleriniń ólimine ákeletinin aıtty.
Lapıdtiń pikirinshe, Ulttyq qaýipsizdik mınıstri Itamar Ben-Gvır men qarjy mınıstri Betsalel Smotrıch Netanıahýdy áskerı operatsııalardy uzartýǵa, kóptegen sarbazdardyń ólimine jáne ızraıldik salyq tóleýshilerge ondaǵan mıllıardtaǵan shyǵyn ákeletin sheshimge «tartty».
Mysyr
Mysyr alańdaýshylyǵyn bildirip, eger sodyrlarǵa qashý múmkindigin bermese, Izraıldiń jospary HAMAS qolynda ustaǵan ızraıldikterdiń ólim jazasyna kesilýi múmkin ekenin eskertti.
Prezıdent Ábdel-Fattah as-Sısı Izraıl men HAMAS arasyndaǵy atysty toqtatý týraly kelissózdi dereý qaıta bastaýdy talap etti. Ol sondaı-aq AQSh prezıdenti Donald Tramppen zorlyq-zombylyqty toqtatý áreketterine baǵyttalǵan tikeleı kelissóz júrgizýdi surady.
Qytaı
Qytaı da Izraıldiń Gaza qalasyn baqylaýǵa alý josparyna qatysty «qatty alańdaýshylyǵyn» bildirip, ony «qaýipti áreketterin dereý toqtatýǵa» shaqyrdy.
— Gaza Palestına halqyna tıesili jáne ol Palestına aýmaǵynyń ajyramas bóligi, — dep málimdedi QHR Syrtqy ister mınıstrliginiń ókili AFP agenttigine.
Ulybrıtanııa
Birikken Koroldik ta qaqtyǵystyń órshýine alańdaýshylyǵyn bildirdi. Premer-mınıstr Ktr Starmer Izraıldiń Gazany basyp alý sheshimin aıyptap, bul aımaqtaǵy gýmanıtarlyq apatty odan saıyn ýshyqtyratynyn málimdedi.
— Izraıldiń bul sheshimi beıbit turǵyndardyń qaıǵy-qasiretin arttyryp, qosymsha qantógiske ákeledi, — dep málimdedi Starmer.
Ol Izraıldi áreketin dereý qaıta qaraýǵa shaqyrdy, olardyń qaqtyǵysty beıbit jolmen sheshýge ákelmeıtinin alǵa tartty.
Aýstralııa
Óz kezeginde Aýstralııa da Gazadaǵy gýmanıtarlyq jaǵdaıdy alǵa tartyp, Izraıldiń sheshimin aıyptady. Eldiń syrtqy ister mınıstri Pennı Vong Izraıldi sektorǵa áskerı baqylaýynan bas tartýǵa shaqyryp, halyqty kúshtep kóshirý halyqaralyq normalardy buzady dep basa aıtty.
Túrkııa
Túrkııa Syrtqy ister mınıstrligi Izraıldiń Gaza qalasyn baqylaýǵa alý josparyn qatań aıyptap, halyqaralyq qaýymdastyq pen BUU Qaýipsizdik keńesin bul jospardyń júzege asýyn boldyrmaý úshin áreket etýge shaqyrdy.
Buǵan deıin Netanıahý Gaza sektoryn tolyq basyp alýdy kózdep otyrǵanyn jazǵan edik.