Halyqaralyq qatynastaǵy shıelenister men ozbyrlyqtyń saldarynan qaqtyǵystar men soǵystar beleń aldy — Prezıdent
ASTANA. KAZINFORM — Alpaýyt elder men halyqaralyq odaqtar arasyndaǵy qarama-qaıshylyqtardyń aýqymy ósip bara jatyr. Bul týraly Memleket basshysy Qasym-Jomart Toqaev Qazaqstan halqyna Joldaýynda aıtty.
— Ótken aptada Parlamenttiń jańa sessııasy ashyldy. Qyzmetterińizge tabys tileımin. Aldyńǵy sessııa jemisti boldy dep kúmánsiz aıtýǵa bolady. Elge qajetti kóptegen zań qabyldandy. Halyqtyń kókeıinde júrgen ózekti máseleler kóterildi, jan-jaqty talqylandy. Depýtattar jazǵy demalys kezinde aımaqtarǵa baryp, azamattarmen kezdesti. Endi jurtyshylyq aıtqan máselelerdi saralap, Úkimetpen birge pysyqtap, osy sessııa barysynda eskerý qajet. Jalpy, Parlament depýtattary elimizde túbegeıli reformalar jasaý jolynda mańyzdy ról atqaryp keledi. Sizderge zor rızashylyǵymdy bildiremin, — dedi Memleket basshysy.
Prezıdent qazir dúnıejúzi jańa tarıhı dáýirge qadam basqanyn atap ótti.
— Bul dáýirdiń barsha adamzat úshin ońaı bolmaıtyny anyq. Alpaýyt elder men halyqaralyq odaqtar arasyndaǵy qarama-qaıshylyqtardyń aýqymy ósip bara jatyr. Halyqaralyq qatynastaǵy shıelenister men ozbyrlyqtyń saldarynan qaqtyǵystar men soǵystar beleń aldy. Keıbir memleketterdiń ishki jáne syrtqy saıasatynda ásire ultshyldyq kúsheıdi. Álem ekonomıkasynda teńgerimsizdikter men qaıshylyqtar ýshyǵa tústi. Keıbir memleketter ekonomıkalyq damýda artta qalyp, keıbir elder jasandy ıntellekt salasynda teńdessiz tabysqa jetýde, — dedi Qasym-Jomart Toqaev.
Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.
Kazinform saıty tikeleı efırmen qatar, jazbasha translıatsııa da jasaıdy.
Sondaı-aq Joldaý mátinin agenttiktiń telegram arnasynan oqýǵa bolady.