Halyqaralyq IT bilim: Qostanaı stýdentteri AQSh dıplomyn da alýǵa múmkindik alady
QOSTANAI. KAZINFORM — Ahmet Baıtursynuly atyndaǵy Qostanaı óńirlik ýnıversıteti (QÓÝ) halyqaralyq yntymaqtastyqty júıeli túrde damytyp keledi. Qos dıplomdy bilim berý jónindegi kelisim aıasynda Baitursynuly University rektory Seıtbek Qýanyshbaev University of Minnesota Morris atty AQSh-tyń oqý ornynda boldy. Bul týraly Ǵylym jáne joǵary bilim mınıstrligi málim etti.
— Ótken jyly amerıkalyq seriktes ýnıversıtet delegatsııasy Qostanaı joǵary oqý ornyna kelgen. Kezdesý nátıjesinde «Computer Science» bilim berý baǵdarlamasy boıynsha qos dıplomdy bilim berý týraly kelisim jasaldy. Atalǵan baǵdarlama aıasynda Baitursynuly University IT baǵyty boıynsha bilim alatyn stýdentter Qazaqstan men AQSh joǵary oqý oryndarynyń qos dıplomyn alý múmkindigine ıe bolady. Bul — elimizdegi jedel tsıfrlandyrý úderisterin jáne jańa tehnologııalardyń engizilýin eskergende eńbek naryǵynda suranysqa ıe asa ózekti mamandyq, — dep jazdy vedomstvodan.
University of Minnesota Morris-pen birlesken qos dıplom baǵdarlamasy — álemdik deńgeıdegi bilimge qol jetkizýge, halyqaralyq tájirıbe jınaqtaýǵa jáne IT salasy men ózge de strategııalyq mańyzdy baǵyttardyń bolashaǵyn qalyptastyrýǵa úles qosatyn bilikti maman atanýǵa jol ashatyn erekshe múmkindik.
Aıta keteıik, University of Minnesota Morris — AQSh-tyń eń kóne jáne bedeldi joǵary oqý oryndarynyń biri. 1851 jyly negizi qalanǵan bul ýnıversıtet eldiń úzdik 30 oqý ornynyń qataryna kiredi. Sondaı-aq sheteldik stýdentter úshin eń qolaıly ýnıversıtetterdiń ishinde 9-orynda, QS halyqaralyq reıtınginde 203-orynda, ulttyq reıtıngte 6-orynda tur. Ýnıversıtettiń túlekteri men ǵalymdarynyń qatarynda 26 Nobel syılyǵynyń laýreaty bar.
Qos dıplom baǵdarlamasynyń túlekteri halyqaralyq deńgeıdegi tájirıbege saı bilim alyp, qazirgi eńbek naryǵy talap etetin álemdik standarttarǵa tolyq sáıkes bolmaq.
Kelisim boıynsha stýdentter 3 jyldy Qostanaıda, 1 jyldy AQSh-ta oqıdy. Kezdesý barysynda University of Minnesota Morris basshylyǵy Baitursynuly University rektoryna stýdenttik kampýsty jáne qostanaılyq stýdentterdi qabyldaýǵa daıyn oqý aýdıtorııalaryn tanystyrdy. Sonymen qatar onlaın-oqytý máseleleri talqylanyp, qazirgi tańda QÓÝ-de qashyqtan sabaq berip júrgen amerıkalyq professorlarmen kezdesý uıymdastyryldy.
Aldaǵy ýaqytta University of Minnesota Morris professory, jasandy ıntellekt salasynda mol tájirıbesi bar ǵalym Peter Dolan Qostanaıǵa keledi dep kútiledi. Ol stýdentter men professorlyq-oqytýshylyq quramǵa dárister júrgizetin bolady.
Eske sala keteıik, buǵan deıin Qazaqstanda bilim berý salasy jańaryp, JI tehnologııalary jappaı oqytylyp jatqanyn jazǵan edik.