Halyqaralyq gýmanıtarlyq uıymdar Izraıldiń Gazaǵa shabýylyn toqtatýǵa shaqyrdy
ASTANA. KAZINFORM — Álemniń jetekshi úkimettik emes uıymdarynyń ondaǵan ókili Izraıldiń Gaza qalasyna jasaǵan áskerı operatsııasyn dereý toqtatýǵa shaqyryp, qatań úndeý jasady, dep habarlaıdy Kazinform agenttiginiń menshikti tilshisi.
Sársenbi kúni gýmanıtarlyq uıymdar koalıtsııasy álemdik qaýymdastyqqa úndeý joldap, Izraıldiń Gaza qalasyndaǵy áskerı áreketterin toqtatýdy talap etti.
Arasynda Save the Children, Oxfam, Islamic Relief, Norwegian Refugee Council jáne taǵy basqa 20-dan astam halyqaralyq uıym qol qoıǵan bul qujatta Gaza sektoryndaǵy jaǵdaı «kóp kórmegen gýmanıtarlyq apat» dep sıpattalǵan.
We stand alongside more than 20 major aid agencies working in #Gaza in calling on world leaders to urgently intervene after a UN commission concluded, for the first time, that genocide is being committed.
— Norwegian Refugee Council (@NRC_Norway) September 17, 2025
Joint statement ⬇️ https://t.co/Wpv5kA9Hus
Bul úndeý BUU-nyń arnaıy komıssııasy Gaza sektoryndaǵy jaǵdaıdan genotsıd belgilerin anyqtaǵany týraly baıandamasynan keıin jarııalandy. Uıym ókilderiniń pikirinshe:
— Memleketter Gaza sektoryndaǵy beıbit turǵyndardyń joıylýyn boldyrmaý úshin barlyq saıası, ekonomıkalyq jáne quqyqtyq tetikterdi paıdalaný kerek.
Gýmanıtarlyq uıymdar óz málimdemesinde bylaı dep jazdy:
— Biz Gaza sektorynda tek gýmanıtarlyq daǵdarysty ǵana emes, sonymen qatar BUU-nyń tergeý komıssııasy genotsıd dep tanyǵan jaǵdaıdy da kórip otyrmyz.
Málimdemede atap kórsetilgendeı, Gaza qalasynan bir mıllıonǵa jýyq adamnyń jappaı kóshýi bul aýmaqty ómir súrýge jaramsyz etip otyr.
— Qazir — shyndyqtyń sáti. Bul — búkil álem úshin adamgershilikke syn. Halyqaralyq qaýymdastyq bul synaqtan áli óte alǵan joq, — delingen úndeýde.
Uıymdar atap ótkendeı:
— Memleketter qolyndaǵy barlyq saıası, ekonomıkalyq jáne quqyqtyq quraldardy qoldanýǵa tıis. Bos sózder men jartylaı sharalar jetkiliksiz. Qazirgi jaǵdaı — batyl áreketterdi talap etedi.
Eske salaıyq, sársenbi kúni Izraıl Qorǵanys armııasy Gazadan 400 myńǵa jýyq turǵynnyń ońtústikke qaraı evakýatsııalanǵanyn málimdegen bolatyn.
Gaza sektorynyń soltústiginde ınternet pen baılanys tolyǵymen óshirildi.