Halyqaralyq ǵylymı joba baıqaýlarynyń jeńimpazdaryna memlekettik syıaqy taǵaıyndalady

ASTANA. KAZINFORM - Qazaqstanda daryndy oqýshylardy jáne olardyń jetekshilerin qoldaý men yntalandyrý mehanızmderi zańnamalyq deńgeıde bekitildi, dep habarlaıdy QR Oqý-aǵartý mınıstrliginiń baspasóz qyzmeti.

Baspasóz qyzmetiniń habarlaýynsha, bıyldan bastap halyqaralyq ǵylymı joba baıqaýlarynda úzdik nátıjege qol jetkizgen oqýshylar men olardy daıyndaǵan pedagogterge memlekettik bir rettik aqshalaı syıaqy taǵaıyndalady.

Memleket basshysy Qasym-Jomart Toqaev kúni keshe qol qoıǵan «Qazaqstan Respýblıkasynyń keıbir zańnamalyq aktilerine mádenıet, bilim berý, otbasy jáne memlekettik baqylaý máseleleri boıynsha ózgerister men tolyqtyrýlar engizý týraly» Zań balalardyń bilim men ǵylymǵa qyzyǵýshylyǵyn arttyrýǵa baǵyttalǵan mańyzdy ózgeristerdi qamtıdy.

Bul zańnyń qabyldanýy Memleket basshysynyń daryndy jastardy jan-jaqty qoldaýǵa baǵyttalǵan reformalarynyń júıeli jalǵasy. Buǵan deıin mundaı kótermeleý halyqaralyq pándik olımpıadalarǵa qatysqan oqýshylar men ustazdarǵa da berilgen bolatyn.

Endi halyqaralyq bedeldi pándik olımpıadalarmen qatar halyqaralyq ǵylymı baıqaýlarda altyn medal ıelengen oqýshylar 1500 AEK-ke deıin, kúmis medal ıegerleri 1000 AEK, al qola medal alǵandar 500 AEK kóleminde memlekettik syıaqy alady. Sonymen birge olardy jarysqa daıyndaǵan pedagogterge 26,5 bazalyq laýazymdyq aılyqqa deıingi syıaqy taǵaıyndalady.

Bıyl jalpy bilim beretin pánder boıynsha 7 bedeldi halyqaralyq olımpıadada Qazaqstan quramasy 27 medal ıelendi (4 altyn, 13 kúmis, 10 qola). Onyń qorytyndysy boıynsha 27 jeńimpaz oqýshyǵa 94,3 mln teńge, al 24 pedagogqa 7,4 mln teńge tólendi.

-Jańa normalar daryndy balalardy qoldaý júıesin kúsheıtip qana qoımaı, bilim salasyndaǵy joǵary nátıjelerdiń bedelin arttyryp, elde olımpıadalyq ári ǵylymı qozǵalystyń odan ári damýyna jańa múmkindik beredi,-delingen habarlamada. 

Osyǵan deıin Qazaqstanda bilim salasyna jasandy ıntellektini engizý jónindegi jumys toby qurylǵany týraly jazdyq.