Halyqaralyq ǵylymı baıqaýda júldeger bolǵan oqýshylarǵa aqshalaı syıaqy berilmek

ASTANA. KAZINFORM – Halyqaralyq ǵylymı baıqaýlardyń jeńimpazy jáne júldegerleri bolǵan oqýshylarǵa aqshalaı syıaqy berilmek. Bul jaıynda Májilis depýtaty Ashat Aımaǵambetov Facebook paraqshasynda jazdy.

- Máselelerdi kezeń-kezeńimen sheshý – eń tıimdi ádisterdiń biri. Keıde bir máseleni sheshý úshin usynys jasaısyń, biraq ol birden qoldaý tappaýy múmkin. Osyndaı sátterde keıbir adamdar beti qaıtyp, bastamasynan bas tartady. Alaıda máseleni qaıta-qaıta kóterip, birtindep ilgeriletseń, túptiń túbinde ony tolyq sheshý múmkindigi paıda bolady. Mysaly, halyqaralyq ǵylymı baıqaýlardyń jeńimpazdaryna ýnıversıtetke túsý úshin grant berý jáne birjolǵy aqshalaı syıaqy taǵaıyndaý máselesin biz eki jyl boıy kóterdik. Tipti, ashyǵyn aıtqanda, mınıstr bolǵan kezimde tek halyqaralyq olımpıadalardyń jeńimpazdary ǵana emes, ǵylymı jobalardyń da jeńimpazdary osy buıryq jobasyna engizilgen edi. Biraq Qarjy mınıstrligi qarajat jetpeıdi dep qoldamaı, sol buıryqpen tek olımpıada jeńimpazdary qamtylǵan-dy, - dep atap ótedi ol.

Onyń atap ótýinshe Parlamentte jumys jalǵasyp, tıisti túzetýler ázirlengen jáne Úkimetke birneshe ret usynys jasalǵan.

- Alǵashqy talpynystarda qoldaý taba almadyq. Odan keıin usynysymyz jartylaı sheshildi: grant bólý máselesi maquldanyp, jýyrda qabyldanǵan zańǵa sáıkes, halyqaralyq ǵylymı jobalar baıqaýlarynyń jeńimpazdary endi UBT tapsyrmaı-aq grantqa ıe bola alady. Biraq aqshalaı syıaqy jaǵy taǵy qoldaý tappady. Osydan keıin biz aqshalaı syıaqy máselesin qaıta-qaıta kóterdik. Nátıjesinde, mine, ol da sheshimin tapty. Bizdiń komıtettiń otyrysynda halyqaralyq ǵylymı baıqaýlardyń jeńimpazdary men júldegerlerine, sondaı-aq olardy daıyndaǵan pedagogtarǵa birjolǵy aqshalaı syıaqy berý týraly túzetýler qabyldandy. Endi jalpy otyrysqa shyǵarylady, - dep atap ótedi Ashat Aımaǵambetov.

 7 jasar oqýshy halyqaralyq ǵylymı olımpıadada altyn medal alǵanyn jazǵan bolatynbyz.