Halyqaralyq eriktiler jyly: qazaq jastary úndeý jasady
ASTANA. KAZINFORM – Halyqaralyq eriktiler jyly jarııalanýyna oraı «Jańa adamdar» qozǵalysynyń músheleri bas qosty. Jıynda belsendi jastar barlyq qazaqstandyqty eriktilik bastamalarǵa atsalysýǵa shaqyrdy.
Іs-sharada elimizdiń ár túkpirinen kelgen júzdegen erikti volonterliktiń mán-mańyzyn talqylady. Olar zań aıasynda áreket etip, ýákiletti organdarmen jáne qoǵammen birlesip jumys isteıtinin alǵa tartty.
– Prezıdent atap ótkendeı: «Naǵyz volonter tutas qoǵamnyń ıgiligin oılaıtyn, elimizdiń murat-múddesin bıikke qoıatyn sanaly azamat ekeni sózsiz». Demek, eriktilik – jeke paıda úshin emes, ortaq is úshin áreket etý jáne qoǵam aldyndaǵy jaýapkershilikti seziný. Volonter óz qamyn ǵana kúıtteýmen shektelmeı, aınalasynda bolyp jatqan jaıttarǵa ún qatady jáne ıgi isterge úles qosady» – dedi «Jańa adamdar» qozǵalysynyń kóshbasshysy Ásel Bádenova.
Jastar qozǵalysynyń jetekshisi Memleket basshysynyń sózin tilge tıek etýi tegin emes. Óıtkeni, Qasym-Jomart Toqaev árdaıym volonterlik qyzmetke qoldaý bildirip keledi. 2026 jyl BUU deńgeıinde Halyqaralyq eriktiler jyly dep jarııalanǵan soń, Astanada Volonterler forýmy ótip, onda Prezıdent birqatar mańyzdy málimdeme jasaǵan edi.
– Volonterlikti damytý úshin memleket deńgeıindegi jańa júıeli sharalar qajet.
Bıyl eriktiler isin damytýǵa arnalǵan úsh jyldyq Jol kartasyn iske asyrý merzimi aıaqtalady. Sondyqtan Úkimet 2030 jylǵa deıingi kezeńdi qamtıtyn jańa mazmundy qujat ázirlegeni jón.Buǵan deıin qabyldanǵan sharalardyń tıimdiligine baǵa berý jáne Qazaqstannyń halyqaralyq mindettemelerine saı volonterlik qozǵalysty nyǵaıtý úshin qosymsha yntalandyrý tetikterin qarastyrý mańyzdy, – degen bolatyn Memleket basshysy.
Eske salaıyq, atalǵan forýmda eriktilerge arnalǵan «Meıirim» ordenin taǵaıyndaý týraly Prezıdent sheshimi jóninde de buǵan deıin habarlaǵan bolatynbyz.