Halyqaralyq ekspedıtsııanyń Qyzylordaǵa sapary aıaqtaldy
QYZYLORDA. KAZINFORM – «Eýrazııa júregine saıahat» atty halyqaralyq týrıstik ekspedıtsııanyń Qyzylorda oblysyna sapary sátti qorytyndylandy.
Oblystyq dene shynyqtyrý, sport jáne týrızm basqarmasynan habarlaǵandaı, qonaqtar Baıqońyr qalasy men Qarmaqshy aýdanyna taban tiredi.
Ǵarysh zymyrandarynyń ushý alańy men tarıhı mýzeıdi aralady. Jeńistiń 80 jyldyǵyna oraı Baıqońyr qalasyndaǵy Taǵzym alańyna baryp, máńgilik alaý janyna gúl shoqtaryn qoıdy.
– Sapar ári qaraı Qarmaqshy aýdanyndaǵy Qorqyt ata memorıaldy kesheninde jalǵasty. Munda týrısterdi ulttyq kıimdegi ónerpazdar qarsy alyp, arnaıy ázirlengen dámnen aýyz tıgizdi. Qonaqtar keshen ishindegi Qorqyt murajaıyn aralap, ultymyzdyń tarıhı-mádenı qundylyqtarymen jaqyn tanysty, - delingen habarlamada.
Qyzylorda qalasyndaǵy sapary kezinde ekspedıtsııa músheleri aldymen qaladaǵy «Muz aıdyny» sport kesheninde boldy. Týrıster ulttyq taǵamdardan dám tatyp, nysannyń arhıtektýralyq ereksheligin, jumysyn kórdi. Sonymen qatar qaıta jańǵyrtylǵan keshenniń jańa keıpin tamashalady.
– Odan keıin ekspedıtsııa músheleri jaqynda ǵana paıdalanýǵa berilgen oblystyq tarıhı-ólketaný mýzeıine bardy. Ondaǵy baı jádigerler men arheologııalyq oljalar sheteldik týrısterdiń qyzyǵýshylyǵyn týǵyzdy. Olar Syr óńiriniń ejelgi tarıhy jáne mádenıetimen tereńirek tanysyp, qazaq halqynyń baı murasyna tánti boldy. «Anaǵa taǵzym» ortalyǵyna aıaldap, Batyrhan Shúkenov atyndaǵy saıabaqta dostyq aǵashyn otyrǵyzdy. Bul sapar sheteldik saıahatshylar úshin tek tanymdyq mańyzy bar shara ǵana emes, sondaı-aq qazaq halqynyń rýhanı baılyǵy men mádenıetinen syr shertken taǵylymdy kezdesýge aınaldy, - delingen habarlamada.
Ekspedıtsııa quramynda Qazaqstan, Qyrǵyzstan, Ózbekstan, Reseı jáne Tájikstan elderiniń 100-den astam ókili boldy.
Buǵan deıin meımandar Aral aýdanyna baryp, kórneki oryndardy tamashalaǵan bolatyn.
Qyzylordada «XXI ǵasyrdyń qarjylyq trıggerleri» taqyrybynda forým ótti.
