Memleket basshysy merziminen buryn qyzmetten ketse 2 aı ishinde kezekten tys Prezıdent saılaý ótedi degen norma negizgi zańda naqty belgilenýi qajet — Toqaev

QYZYLORDA. KAZINFORM — Memleket basshysy merziminen buryn qyzmetten ketse 2 aıdyń ishinde kezekten tys Prezıdent saılaý ótedi degen norma negizgi zańda naqty belgilenýi qajet. Bul týraly Memleket basshysy Qasym-Jomart Toqaev Qyzylorda qalasynda ótip jatqan Ulttyq quryltaıdyń V otyrysynda aıtty.

— Qazirgi Ata zańǵa sáıkes, Prezıdent óz mindetin atqara almaıtyndaı oqys jaǵdaı týyndasa, onyń ókilettigi qalǵan merzimge Senat tóraǵasyna beriledi. Senat tóraǵasynyń memlekettik basqarýǵa múmkindigi bolmasa, Prezıdent ókilettigi belgilengen tártipke sáıkes, kelesi laýazym ıelerine ótedi. Bul rette máseleniń bári qalǵan merzimge degen sózge kelip tireledi. Osy máseleni erekshe atap ótken jón. Basqasha aıtsaq, qalǵan merzim 6 aıǵa da, 6 jylǵa da sozylýy múmkin. Sondyqtan Memleket basshysy merziminen buryn qyzmetten ketse 2 aıdyń ishinde kezekten tys Prezıdent saılaý ótedi degen norma negizgi zańda naqty belgilenýi qajet. Bul qadam halyqaralyq ozyq tájirıbege saı keledi. Elimizdiń kez kelgen basshysy bılikke saılaý arqyly, ıaǵnı zańdy túrde kelý kerek. Bul men úshin myzǵymas ustanym. Osy norma endi Memleket basshylary úshin de esh ózgermeıtin qaǵıdat bolýy tıis, — dedi Qasym-Jomart Toqaev.

Aıta keteıik, Quryltaıda kásipkerlikke jeńildetilgen nesıe júıesin engizý usynyldy.