Halyqaralyq deńgeıdegi sport nysandary óte jaqsy salynǵan – Nenad Lalovıch
ASTANA. KAZINFORM – Qazaqstanǵa resmı saparmen kelgen Birikken kúres álemi halyqaralyq federatsııasynyń prezıdenti Nenad Lalovıch elordadaǵy sport nysandaryn aralap, jumys barysymen tanysty.

Nenad myrza aldymen 2020 jyldyń sońyna qaraı paıdalanýǵa berilgen Qazaqstan jeńil atletıkalyq sport keshenin aralap kórdi. Sport kesheni Halyqaralyq jeńil atletıka federatsııasynyń (IAAF) sertıfıkatyna ıe. Bul sertıfıkat munda eń joǵary deńgeıdegi kez kelgen jarystardy ótkizýge múmkindik beredi. Keshende júgirý joldary bar atletıkalyq alań, basseın, qonaq úı, balalar alańy, fýd-kort, trenajer zaly, ıadro laqtyrý alańy, bıiktikke jáne uzyndyqqa sekirýge arnalǵan jattyǵý alańdary ornalasqan.

Sondaı-aq Birikken kúres álemi halyqaralyq federatsııasynyń prezıdenti Jaqsylyq Úshkempirov atyndaǵy Jekpe-jek saraıyna bardy. Jekpe-jek saraıy – kúres túrlerinen (grek-rım, erkin, áıelder kúresi, dzıýdo, karate, taekvondo, aralas jekpe-jek) halyqaralyq jarystardy ótkizý múmkindigi bar biregeı sport kesheni.


- Astanaǵa kezekti ret kelgenime qýanyshtymyn! Elordalaryńyz burynǵydan da kórkeıip, sán-saltanaty jarasqan, kóz tartarlyqtaı ásem ǵımarattarmen tolyǵa túsken. Búgin Astananyń ajaryn ashyp, sportty qalaǵa aınaldyrǵan birneshe sport keshenin aralap, tamasha ınfraqurylymmen tanystym. Halyqaralyq deńgeıdegi sport nysandary óte joǵary deńgeıde, sportshylar men jankúıerlerge yńǵaıly etip salynǵan. Bul nysandardyń kez kelgeni halyqaralyq deńgeıdegi jarystardy qabyldaýǵa qabiletti,- dep atap ótti Nenad Lalovıch.
Eske salsaq Qazaqstanǵa Birikken kúres álemi prezıdenti kelgenin habarlaǵan edik.