Halyqaralyq daý-damaılarda araaǵaıyn bolatyn oıym joq – Prezıdent

ASTANA. KAZINFORM – Halyqaralyq daý-damaılarda ara aǵaıyn bolatyn eshqandaı oıym joq. Bul týraly «Turkistan» gazetine suhbat bergen Memleket basshysy Qasym-Jomart Toqaev aıtty.

– Syrtqy saıasatqa qatysty joǵary deńgeıdegi is-sharalardyń kóptigi Qazaqstannyń abyroı-bedeli ósip, halyqaralyq quqyq sýbektisi retindegi róli arta túskenin kórsetedi. Shetelge jasaǵan saparlarymnan bólek, Azııa, Eýropa jáne Taıaý Shyǵys aımaqtaryndaǵy yqpaldy memleketterdiń basshylary Astanaǵa saparmen keldi. Árbir kelissózde ekonomıkalyq jáne ınvestıtsııalyq yqpaldastyqqa, álemdik arenadaǵy qarym-qatynasqa qatysty mańyzdy máseleler kóteriledi. Byltyr ekonomıkamyzdaǵy basymdyq berilgen salalardy damytý úshin jalpy somasy 70 mıllıard dollardan asatyn qujattarǵa qol qoıyldy, - dedi Memleket basshysy.

Prezıdenttiń paıymynsha, Qazaqstan Eýrazııa kindiginde ornalasqan el retinde, ásirese, qazirgi almaǵaıyp zamanda túrli úderisten syrt qalmaýy kerek.

- Bizdiń halyqaralyq qatynastaǵy negizgi máseleler týraly óz kózqarasymyz, naqty ustanymymyz bolýǵa tıis. Sondyqtan, men BUU Bas Assambleıasynyń mereıtoılyq sessııasynda osy ámbebap jahandyq uıymdy reformalaýǵa qatysty Qazaqstannyń ustanymyn egjeı-tegjeıli aıtyp óttim. Halyqaralyq daý-damaılarda ara aǵaıyn bolatyn eshqandaı oıym joq, sondaı-aq, birqatar elderdiń usynys-pikirine qaramastan, BUU-daǵy jumysqa qaıta oralatyn nıetim de joq. Biraq, jabyq keńester men pikirtalastarǵa qatysamyn, onyń ústine birqatar memleket basshylary meniń pikirimdi bilgisi keledi. Men úshin osy mańyzdy jumysty buqaralyq aqparat quraldarynda jarııalaýdyń esh qajettigi joq, sebebi popýlızmnen aýlaqpyn. Bul ustanymym jabyq keńesterge qatysýshylar úshin de mańyzdy bolsa kerek, - dedi Qasym-Jomart Toqaev.

Aıta keteıik, búgin Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy.