Halyqaralyq bilim berý korporatsııasynda stýdenttik jataqhana ashyldy
ASTANA. KAZINFORM — Almaty qalasynda Halyqaralyq bilim berý korporatsııasynyń Stýdentter úıi ashyldy. 300-den astam orynǵa laıyqtalǵan jataqhananyń ashylý saltanatyna qala ákimi Darhan Satybaldy qatysty. Bul týraly QR Ǵylym jáne joǵary bilim mınıstrligi jazdy.
Jańa nysan — oqý ornynyń bilim berý ınfraqurylymyn damytý jónindegi aýqymdy baǵdarlamasynyń bir bóligi. 339 orynǵa arnalǵan jataqhana stýdenttik turǵyn úıdiń halyqaralyq standarttaryna saı jabdyqtalǵan, zamanaýı kovorkıng-aımaqtardy qamtıdy jáne kampýstyń biryńǵaı basqarý júıesine ıntegratsııalanǵan. Bul júıege qol jetkizýdi baqylaý men basqarý, sondaı-aq qaýipsizdik boıynsha sıtýatsııalyq ortalyq kiredi.
Resmı ashylýdan keıin HBK Baqylaý keńesiniń tóraǵasy Aıǵazy Qusaıynov korporatsııanyń qyzmeti jóninde tolyǵyraq toqtalyp, negizgi jobalar men ǵylymı ázirlemeler kórsetilgen zerthanalyq bazaǵa ekskýrsııa ótkizdi.
— Jańa Stýdentter úıiniń ashylýy — Almaty qalasynyń Bas josparynda bekitilgen Academic City jobasyn iske asyrýdaǵy kezekti mańyzdy qadam. Aldaǵy eki jyl ishinde kampýs aýmaǵynda Qazaqstandaǵy eń iri bilim berý klasteri boı kóteredi. Ol jańa stýdenttik jáne oqytýshylar jataqhanalaryn, kovorkıngterdi, ǵylymı zerthanalardy jáne áleýmettik ınfraqurylymdy qamtıdy, — dep jazdy vedomstvonyń resmı saıty.
Buǵan deıin stýdentter jataqhanadan oryn alýǵa onlaın ótinish bere alatyny týraly jazdyq.